Некалі беларускія мужчыны спявалі пры касьбе, а цяпер — пры піве.
Праграма «Вяскоўцы» тэлеканала «Белсат» працягвае сваё падарожжа па беларускіх селішчах і даведваецца шмат новага пра жыццё сучасных жыхароў Беларусі.
Спачатку вядоўцу праграмы Віктара Шукеловіча падабралі на дарозе два каларытныя мужчыны з вёскі Пяршаі Валожынскага раёну. Яны падвезлі Віктара на мотаблоку па дарозе, якой некалі ездзіў граф Тышкевіч,
распавёўшы пры нагодзе пра вясковае жыццё. Адзін з пяршайцаў падзяліўся, чаму на вёсцы жанчынам жывецца цяжэй, ці шкадуе ён сваю жонку і паводле якой сістэмы дапамагае ёй па гаспадарцы.
Віктар даведаўся таксама, як граф Тышкевіч ставіўся да працаўнікоў і якія выдаваў ім прэміі. У Пяршаях патлумачылі, чым было слаўнае селішча, адкуль яно ўзяло сваю назву і чаму сюды прыязджалі жыхары Балтыйскага ўзбярэжжа?
Пазней вядоўца трапіў на піўную вечарыну ў вёску Энергія Пухавіцкага раёну.
Там Віктара ды іншых гасцей свежым хмельным напоем уласнага прыгатавання частаваў спадар Васіль Прымака, прыхільнік і знаўца даўнейшых беларускіх традыцыяў. Між іншым ён расказаў Віктару, ці беларусы надавалі назву свайму піву, хто ўмеў яго гатаваць на вёсцы і якое значэнне меў у даўнейшыя часы хмель.
Віктару таксама карцела даведацца, ці беларусы колісь адмыслова ладзілі піўныя вечарынкі і чаму цяпер хлопцы збіраюцца самі, без дзяўчат?
Вядоўцу распавялі, што і раней былі моманты, калі разам, у адной грамадзе, спявалі выключна мужчыны. Што гэта былі за сітуацыі і якія ёсць народныя прымаўкі, дзе згадваецца піва?
Вядома, не абышлося за бяседным сталом і без показак, песняў, прапановы зладзіць бойку і, канешне ж, невялікай спрэчкі. А што ж выклікала рознагалоссе на імпрэзе ў Энергіі, — глядзіце ў новым выданні праграмы «Вяскоўцы».
Ранейшыя выданні праграмы даступныя на YouTube-канале «Белсат без палітыкі».
Каментары