Былы генеральны пракурор Украіны западозрыў у замаху экс-віцэ-прэзідэнта ЗША
Былы генеральны пракурор Украіны Віктар Шокін заявіў пра два спыненні сэрца з-за атручэння ртуццю. Ён не выключае, што да гэтага датычны экс-віцэ-прэзідэнт ЗША Джо Байдэн. Пра гэта Шокін паведаміў у эфіры канала 1+1.
«Паводле заключэння грэчаскай клінікі, дзе я знаходзіўся спачатку ў рэанімацыі, у мяне былі два спыненні сэрца. Для таго, каб мяне вярнуць з таго свету, ужылі электрашокеры для маёй рэанімацыі. Затым я знаходзіўся восем сутак у рэанімацыі, а потым мяне перавялі ў палату. Я не мог хадзіць, вучыўся там хадзіць нанова».
Па словах Шокіна, здарылася ўсё гэта ў Грэцыі 10 верасня мінулага года, дзе ён знаходзіўся па сваіх справах. Ён распавёў, што страціў прытомнасць, калі выйшаў з машыны. Дзякуючы таму, што побач была бальніца, яго ўдалося выратаваць.
Пасля гэтага былы кіраўнік пракуратуры паехаў у Вену, каб працягнуць лячэнне. Пасля ўсіх абследаванняў медык паведаміў Шокіну пра наяўнасць іртуці ў яго арганізме.
Як іртуць трапіла ў арганізм Шокіна, пакуль што невядома.
Шокін мяркуе, што Джо Байдэн можа быць датычны да яго атручвання. «Безумоўна, адна з версій, але гэтая версія патрабуе даследавання, але ёсць магчымасць датычнасці Байдэна нейкім чынам да гэтых пытанняў».
Нагадаем, Віктар Шокін быў звольнены з пасады генеральнага пракурора Украіны ў красавіку 2016 года пасля перамоў віцэ-прэзідэнта ЗША Джо Байдэна з тагачасным прэзідэнтам Украіны Пятром Парашэнкам. Шокін лічыць, што гэта адбылося па асабістай просьбе Байдэна з-за «справы Burisma», фігурантам якой быў Байдэн-малодшы.
Цяпер чытаюць
Мсціслаў Мекта: яшчэ адзін рэцыдывіст рвецца ва ўладу, прыкінуўшыся спецназаўцам-ябацькам20
Каментары