Беларусы Бенілюкса апісалі свае ўражанні ад Святланы Ціханоўскай
«Сустрэліся нашы са Змітром дзве Мары — адна наша маленькая дачушка Мара, іншая — наша прэзідэнтка Света. Цяпер разам чакаем здзяйснення трэцяй, усебеларускай, Мары, а з намі чакае ўвесь свет! — напісала ў сябе ў фэйсбуку беларуска Дар'я Слабчанка, якая жыве ў Амстэрдаме.
Зміцер — гэта Дар'ін муж Зміцер Жалезнічэнка. У свой час яго, студэнта-інфарматыка, адлічылі з універсітэта ў Гомелі за палітычную актыўнасць і забралі ў армію. Пасля службы яго ў знак салідарнасці прыняў універсітэт у Нідэрландах. Там ён адвучыўся, там цяпер і працуе праграмістам. А свабодны час (і грошы) траціць на падтрымку руху за грамадзянскія правы і законнасць у Беларусі.
Зміцер і Дар'я спецыяльна рыхтаваліся да візіту Святланы Ціханоўскай у Нідэрланды.
Дарэчы, да прыезду беларускай дэлегацыі бел-чырвона-белыя сцягі залуналі на мэрыях Амстэрдама і Эйндховена.
Ціханоўская мела сустрэчы з прэм'ерам і міністрам замежных спраў.
«Прыезд Святланы Ціханоўскай, якую тут сустракалі на самым высокім узроўні, меў велізарнае значэнне, — расказала «Нашай Ніве» Дар'я Слабчанка. — Пад яе абаянне трапілі ўсе, ад паліцэйскага ў ахове да прэм’ер-міністра. Паразмаўляўшы трохі са Святланай, магу сказаць, што гэта той рэдкі тып чалавека, які сапраўды любіць людзей, ёй не важна, хто перад ёй, кароль ці валацуга, яна будзе бачыць не статус, а асобу. Мо ў гэтым сакрэт ейнага поспеху. Нават у кароткай размове адчуваецца, як яна любіць Беларусь, як кахае і чакае мужа, як прапускае праз сябе боль кожнага, хто цяпер там.
Ціханоўская ў Амстэрдаме сустрэлася таксама з беларускай дыяспарай Нідэрландаў і Бельгіі, абмеркавала прыярытэты.
«Дзякуй усім, хто ў Беларусі. І асабліва сэрца разрываецца цяпер за матуль і цяжарных дзяўчат. Я разумею, што ўсе вы там, мае сябры і незнаёмыя людзі, змагаецеся і за вольную Радзіму для маёй дачкі, і ўдзячнасць за гэта невымерная», — дадае Дар'я Слабчанка.
Цяпер чытаюць
Трамп заявіў, што ідуць перамовы пра вызваленне яшчэ 50 беларускіх палітвязняў, і назваў іх «закладнікамі»33
Трамп заявіў, што ідуць перамовы пра вызваленне яшчэ 50 беларускіх палітвязняў, і назваў іх «закладнікамі»
«Як Вольскі прыходзіў з ператрусам да Коласа, а Крапіва і Глебка даносілі на калег». Апублікаваныя жахлівыя ўспаміны Рыгора Бярозкіна пра рэпрэсіі 1920—1940-х1515
Каментары