«Былі людзі, якія нават не заўважылі». Што адбывалася ўнутры самалёта рэйса Мінск — Барселона, які кружыў над Беларуссю?
Сёння пасажыры рэйса Мінск-Барселона, якія ляцелі «Белавія», так і не дабраліся да Іспаніі. Самалёт быў вымушаны развярнуцца над Кобрынам і пару гадзін кружыць над Брэстчынай. Аказалася, Францыя за пару хвілін да вылету закрыла сваю паветраную прастору для Беларусі. За дзіўнай траекторыяй рэйсу на Флайтрадары сачыла больш за 70 тысяч чалавек. Што адбывалася ў той час унутры салона, «Нашай Ніве» распавяла адна з пасажырак.
«Мы квіткі куплялі даўно, 2-3 месяцы таму. Гэта была запланаваная паездка з сям’ёй. У сувязі з падзеямі апошніх дзён былі думкі, што, магчыма, і наш рэйс адменяць, але самі мы не хацелі нічога мяняць.
Сёння ўсё ішло па плане, пунктуальна. Мы прыехалі загадзя, а 9-й раніцы, каб здаць тэст на каранавірус. У 13.30 узляцелі. І ў нейкі момант заўважылі, што самалёт пастаянна ў адзін бок нахілены. У адных вокнах было бачна толькі неба, а ў другіх — зямля. Не было ніякіх аб’яваў.
Мы запыталі ў сцюардэсы, што адбываецца. Яна па сакрэце нам сказала, што калі мы ўзляцелі, то Францыя і Італія (прагучалі дзве краіны) закрылі паветраную прастору для «Белавія» і мы чакаем, каб атрымаць дазвол на іншы маршрут.
Калі дзве гадзіны палёту накруцілі, нас пакармілі, капітан аб’явіў, што праблемы з Францыяй і Італіяй, нам трэба вярнуцца ў Мінск і або дазаправіцца, каб ехаць па новым маршруце, або адмяніць рэйс.
У 17.15 па мінскім часе мы павінны былі быць у Барселоне. Мы прызямліліся ў беларускім аэрапорце каля 16, заставаліся на месцах. Дзесьці 20 хвілін рыхтаваўся самалёт. Але пасля прыйшлі супрацоўнікі кампаніі і абвясцілі, што ўсё ж рэйс адмяняецца.
Ведаеце, былі людзі, якія не заўважылі, што пятляем. Унутры самалёта яно не адчувалася. Дрэнна нікому не было. Дзецям мы, напрыклад, не казалі, што маршрут змяніўся.
На рэйсе былі таксама транзітныя пасажыры — з Ерэвана, Тбілісі. За намі сядзелі ўкраінкі. Калі пасля аб’явы капітана ўсе спакойна адрэагавалі на сітуацыю, яны здзівіліся: маўляў, ляцелі б расіяне, былі б суцэльныя мацюкі, а тут цішыня».
Па словах пасажыркі, ім паабяцалі вярнуць кошт квіткоў цалкам.
Цяпер чытаюць
«Я супраць. Мовы, якія пакінулі пасля сябе каланізатары ў Афрыцы, сталі шляхам да цывілізацыі». Алексіевіч адказала, як ставіцца да адмовы ад рускай мовы ва Украіне6060
«Я супраць. Мовы, якія пакінулі пасля сябе каланізатары ў Афрыцы, сталі шляхам да цывілізацыі». Алексіевіч адказала, як ставіцца да адмовы ад рускай мовы ва Украіне60
«Як Вольскі прыходзіў з ператрусам да Коласа, а Крапіва і Глебка даносілі на калег». Апублікаваныя жахлівыя ўспаміны Рыгора Бярозкіна пра рэпрэсіі 1920—1940-х1717
Каментары