Пра магчымае адключэнне паведамляе карэспандэнт «Радыё Свабода» ў Бруселі Рыкард Ёзвяк.
Раней лідары заходніх краін праанансавалі адключэнне ад SWIFT Расіі ў найбліжэйшы час.
Што такое SWIFT?
SWIFT (Society for Worldwide Interbank Financial Telecommunication) — скарачэнне ад «Таварыства сусветных міжбанкаўскіх фінансавых тэлекамунікацый». Гэта абароненая сістэма абмену паведамленнямі для трансгранічных плацяжоў.
SWIFT карыстаецца вялікім даверам і дазваляе банкам хутка апрацоўваць вялікія аб'ёмы транзакцый.
Бельгійская сістэма была створана ў 1973 годзе разам з кааператывам, у які ўваходзяць тысячы фінансавых ўстаноў, якія яе выкарыстоўваюць.
Менавіта яна стала асновай міжнароднай фінансавай камунікацыі. У 2020 годзе праз платформу SWIFT штодня адпраўлялася каля 38 мільёнаў паведамленняў. Кожны год з дапамогай гэтай сістэмы пералічваюцца трыльёны еўра.
SWIFT ёсць альтэрнатывы, напрыклад, Расія і Кітай выкарыстоўваюць свае ўласныя аналагічныя сістэмы, але яны не сталі глабальнымі.
Чым адключэнне Беларусі ад SWIFT пагражае бізнэсу
Адключэнне Беларусі ад SWIFT можа справакаваць праблемы з міжнароднымі пералічэннямі, разлікамі з замежнымі контрагентамі, што закране ў першую чаргу імпарцёраў і экспарцёраў, тлумачыла раней Zerkalo.io. Размова не толькі пра спажывецкія тавары, але і пра абсталяванне, сыравіну, розныя камплектуючыя. Калі прыбраць ланцужка экспарту або імпарту SWIFT, то парушаецца ўвесь адладжаны механізм.
Узнікае рызыка, што без аплаты не будуць у тэрміны пастаўленыя тавары. Гэта ў сваю чаргу ставіць пад пытанне своечасовае папаўненне запасаў імпартных тавараў, асабліва павышанага попыту. Так могуць узнікнуць пытанні з асартыментам.
Па-першае, спатрэбіцца час, каб знайсці альтэрнатыву SWIFT. Па-другое, знайсці паўнавартасную замену гэтай сістэме міжбанкаўскіх плацяжоў у многіх выпадках праблематычна без страты хуткасці правядзення плацяжоў, падаражэння кошту паслуг, падаўжэння тэрмінаў паставак. А гэта ўсё дадатковыя нязручнасці.
Адзін з ключавых момантаў у сітуацыі магчымага адключэння ад SWIFT — пытанне часу, наколькі аператыўна ўвядуць абмежаванні, ці будзе ў бізнэса час на адаптацыю да новых умоў.
Немалаважны момант з тым, якім можа быць адключэнне ад SWIFT — усёй краіны ці асобных банкаў.
Каментары