Пентагон: Магчымасць канфлікту паміж вялікімі дзяржавамі расце, а не памяншаецца. Вайна ва Украіне — на гады
Генерал Марк Мілі, старшыня Аб'яднанага камітэта начальнікаў штабоў узброеных сіл ЗША перасцярог, што верагоднасць значнага міжнароднага канфлікту паміж вялікімі дзяржавамі ў сучасным свеце расце, а не змяншаецца. Ён таксама лічыць, што канфлікт ва Украіне «будзе вымярацца гадамі», піша «Голас Амерыкі».
Узброенае ўварванне Расіі ва Украіну «з'яўляецца найбольш сур'ёзнай пагрозай міру і бяспецы ў Еўропе і, магчыма, ва усім свеце за ўсю маю 42-гадовую кар'еру ва ўзброеных сілах ЗША», заявіў генерал Марк Мілі.
«Злучаныя Штаты знаходзяцца ў вельмі важным гістарычным і геастратэгічным паваротным моманце.
Мы аказваемся ў свеце, які становіцца больш нестабільным, і патэнцыял значнага міжнароднага канфлікту паміж вялікімі дзяржавамі расце, а не змяншаецца», — сказаў Мілі.
Расія, зазначыў Мілі, «захоўвае буйны і разнастайны ядзерны патэнцыял, каб пагражаць ЗША» і іх саюзнікам.
«Мы чулі вельмі правакацыйную рыторыку адносна ўзроўню баявой гатоўнасці расійскіх ядзерных сіл», — сказаў старшыня камітэта.
Ён дадаў, што Расія неаднаразова дэманстравала сваю здольнасць і жаданне ажыццяўляць «комплексныя і зламысныя дзеянні ў кіберпрасторы».
Акрамя таго, як мяркуе Мілі, расійскае ўварванне ва Украіну стварыла «небяспечны гістарычны паваротны момант».
Мілі перасцярог, што было б няправільным чакаць хуткага завяршэння канфлікту ва Украіне.
«Я лічу, што гэта зацяжны канфлікт, які будзе вымярацца гадамі. Не ведаю, ці можна казаць пра дзесяцігоддзе, але некалькі гадоў — гэта ўжо дакладна, — сказаў ён. — Я думаю, што ЗША, НАТА, Украіна і ўсе саюзнікі і партнёры, якія яе падтрымліваюць, будуць уцягнутыя ў гэта на працягу доўгага часу».
Міністр абароны ЗША Ллойд Осцін, які выступаў разам з Мілі на слуханнях, назваў РФ «вострай пагрозай» для ЗША.
Аднак у цэлым, на думку Мілі, галоўным «геастратэгічным выклікам» для ЗША ў доўгатэрміновай перспектыве застаецца Кітай. КНР працягвае развіваць свой патэнцыял у розных галінах і «кожны дзень працуе над скарачэннем тэхналагічнага разрыву з ЗША».
«Калі казаць коратка, то яны па-ранейшаму поўныя рашучасці карэнным чынам перагледзець міжнародны парадак на сваю карысць да сярэдзіны стагоддзя. Яны маюць намер стаць роўным супернікам ЗША ў ваенным плане да 2035 года, яны маюць намер развіць свой ваенны патэнцыял, каб захапіць Тайвань да 2027 года», ‒ перасцярог Мілі.
«Там, дзе Расія ўяўляе сабой вострую пагрозу, КНР з'яўляецца геастратэгічным выклікам для нашай нацыянальнай бяспекі ў доўгатэрміновай перспектыве», — падкрэсліў генерал.
Ён указаў, што вельмі важна працягваць падтрымліваць адносіны з КНР нават ва ўмовах канкурэнцыі, «не дазваляючы ім перарасці ў канфлікт».
«Вайна з КНР не з'яўляецца непазбежнай,» — падсумаваў Мілі.
Цяпер чытаюць
Чакаецца новы раўнд перамоваў між Беларуссю і ЗША — літоўскі СМІ9
Каментары