Альпіністка з Расіі ўжо тыдзень знаходзіцца на вышыні 7000 метраў: выратаваць яе не могуць, ежа ў яе скончылася
47-гадовая Наталля Нагавіцына, расійская альпіністка, трапіла ў драматычную сітуацыю: падчас спуску з найвышэйшай кропкі Цянь-Шаня ў Кыргызстане 12 жніўня яна атрымала пералом падчас спуску. Гэта здарылася на вышыні каля 7000 метраў. Надвор'е пакуль не дазваляе ёй дапамагчы. У гэтых жа гарах чатыры гады таму памёр яе муж.
47-гадовая Наталля Нагавіцына 12 жніўня атрымала пералом падчас спуску з Піку Перамогі на вышыні каля 7000 метраў.
На наступны дзень да Наталлі падняліся італьянец Лука і немец, якія прынеслі спальны мяшок, ежу і гарэлку, заначавалі з ёй, а потым спусціліся назад у лагер па падмогу.
Аднак наступная спроба пад’ёму скончылася трагедыяй: італьянец загінуў ад абмаражэнняў і ацёку мозгу.
У гэты ж дзень выратавальны верталёт не змог эвакуіраваць Наталлю з-за складаных умоваў надвор’я і здзейсніў жорсткую пасадку. З 10 чалавек пацярпелі двое, астатнія пачалі эвакуацыю Рамана, спадарожніка Наталлі, які стаў спускацца па дапамогу, і нямецкага альпініста.
На гэты момант вядома, што Наталля знаходзіцца ў разарваным ветрам намёце, укрытая ў спальным мяшку. Паводле кадраў з беспілотніка, яна жывая, але засталася без ежы.
Зараз умовы надвор’я робяць эвакуацыю немагчымаю.
Чатыры гады таму ў гэтых жа гарах загінуў муж Наталлі — Сяргей Нагавіцын, які памёр ад інсульту на вышыні 6900 метраў. Тады Наталля не пакінула яго і правяла побач усю ноч, чакаючы эвакуацыі.
Пазней яна зноў паднялася на пік Хан-Тэнгры і ўстанавіла там памятную шыльду. Аб гэтай гісторыі рэжысёр Дзмітрый Сініцын зняў дакументальны фільм «Застацца з Хан-Тэнгры».
З пачатку жніўня ў гарах Кыргызстана загінулі трое замежнікаў, яшчэ некалькі чалавек атрымалі цяжкія траўмы.
Трамп заявіў, што вядзе з Лукашэнкам перамовы пра вызваленне часткі з 1400 палітвязняў1
Каментары