Белыя красоўкі і кеды — папулярны выбар для лета. Але вось бяда: на такім абутку вельмі хутка пачынае з’яўляцца брудны налёт. Расказваем пра тое, як з гэтым змагацца.
Спачатку паспрабуем вычысціць нашы красоўкі хатнімі сродкамі. Можна паспрабаваць памыць абутак у пральнай машыне, толькі не забудзьце перад гэтым пакласці яго ў адпаведны мяшок для мыцця. Красоўкі звычайна добра пераносяць гэтую працэдуру, але вось іншы белы абутак лепей не класці ў пральную машыну, піша aniaradzi.pl.
Але вы можаце паспрабаваць вычысціць свой абутак уручную. Падрыхтуйце гаспадарчае мыла (лепш вадкае, бо яно не пакідае слядоў) і цёплую ваду. Можна намачыць абутак у мыльнай вадзе і пацерці яго шчоткай — як гумавую частку, так і верх абутку. Для цяжкадаступных месцаў выкарыстоўвайце зубную шчотку.
Гумавыя часткі спартовага абутку можна адбяліць з дапамогай харчовай соды. Проста змяшайце яе з вадой, утрыце тканінай гатовую пасту ў абутак і пакіньце яе высыхаць. Потым можна будзе проста стрэсці часцінкі соды з абутку.
У выпадку са скураным абуткам таксама можна выкарыстаць гаспадарчае мыла. Вазьміце вельмі мяккую тканіну — лепей за ўсё падыдзе мікрафібра — і зусім трошкі намачыце яе мыльнай вадой. Пратрыце абутак, каб прыбраць з яго засохлы бруд, і потым пратрыце боты тканінай, намочанай чыстай вадой.
Калі на абутку вялікія плямы, можна паспрабаваць нанесці трохі вадкага мыла непасрэдна на пляму і трохі пацерці яго тканінай, а потым старанна працерці паверхню абутку мокрай тканінай.
Скураны абутак можна лёгка перасушыць ці сапсаваць праз уплыў вады, і ў такім выпадку матэрыял можа пачаць трэскацца і адслойвацца. Таму лепш звярнуцца да прафесійных сродкаў, тым больш што ў магазінах лёгка знайсці сродкі для чысткі скуры. Некаторыя з іх варта выкарыстоўваць і пасля ачышчэння абутку хатнімі метадамі, каб даўжэй захаваць яго прыгожым.
Каментары
Жар, не стесняйся. ну все ж так делают)