Аляксандр Кікінёў заваяваў бронзу на чэмпіянаце свету па грэка-рымскай барацьбе
Спаборніцтвамі майстроў грэка‑рымскага стылю завершыўся 27 верасня ў дацкім Хернінгу чэмпіянат свету па барацьбе. У вагавай катэгорыі да 74 кг бронзавы медаль заваяваў беларускі спартсмен Аляксандр Кікінёў.
Стартаваўшы з дзвюх перамог, у 1/4 фіналу Кікінёў саступіў турку Сельджуку Чэбі (0:3, 0:2), які затым стаў чэмпіёнам свету. Наш суайчыннік атрымаў шанец пазмагацца за бронзу цераз суцяшальны турнір, і гэта паспяхова ў яго атрымалася.
Спачатку быў пераможаны казах Асет Адзілаў (1:0, 8:0), а затым прадстаўнік Нямеччыны Канстанцін Шнайдэр (2:0, 1:0).
Медаль Кікінёва стаў адзіным для беларусаў у спаборніцтвах грэка‑рымлян.
У камандным заліку беларуская дружына грэка‑рымлян з 14 баламі заняла 12‑е месца.
У тройку наймацнейшых увайшлі зборныя Турцыі — 44 балы, Ірана — 39 і Азербайджана — 38.
У медальным заліку наперадзе Турцыя — 2 залатыя медалі, 1 бронза, Іран — 1 золата, 3 бронзы, Расія, Азербайджан і Куба, у якім па адным золаце і два бронзавыя медалі.
Раней у Хернінгу завершыліся спаборніцтвы сярод барцоў‑вольнікаў, а таксама жаночыя спаборніцтвы.
Беларусы тут занялі 6‑е месца ў камандным заліку, лепшым з іх быў Рызван Гаджыеў, які стаў бронзавым прызёрам у вагавай катэгорыі да 55 кг.
Адзіны медаль у жаночай дружыне заваявала Алена Філіпава (55 кг), якая заваявала бронзу. У камандным заліку жаночая зборная Беларусі заняла 15‑е месца.
Каментары