Украіна на мяжы з Беларуссю размясціла зенітна-ракетныя комплексы Avenger. Што за яны?
Камандуючы Аб’яднанымі сіламі Узброеных сіл Украіны Сяргей Наеў, які ажыццяўляе кіраўніцтва аперацыйнай зонай на паўночнай мяжы Украіны з Беларуссю і Расіяй, заявіў пра ўзмацненне паветранай абароны на гэтым кірунку зенітна-ракетнымі комплексамі Avenger.
«Сістэма прызначана для збіцця крылатых ракет і беспілотнікаў ударнага тыпу. Сістэма добрая і эфектыўная», — заявіў Сяргей Наеў.
Паводле яго, гэтыя ракетныя комплексы Украіне перадалі ЗША, а экіпажы праходзілі навучанне ў Нямеччыне.
Як працуюць ЗРК Avenger
Назва зенітна-ракетнага комплексу (ЗРК) перакладаецца з англійскай як «мсцівец». Яго распрацавала амерыканская кампанія Boeing Aerospace Company супольна з General Electric. Гэты самаходны комплекс можа знішчаць паветраныя цэлі на сустрэчных курсах і ўздагон на вышыні 0,5—3,8 кіламетра і адлегласці 0,5—5,5 кіламетра, піша «Свабода».
На ім знаходзіцца два кантэйнеры, у якія змяшчаецца па чатыры ракеты Stinger, а таксама кулямёт і радыёлакацыйная станцыя. Avenger здольны выяўляць цэлі ў любых умовах надвор’я і бачнасці за кошт убудаванага цеплавізара.
Для кіравання ЗРК дастаткова двух вайскоўцаў. Баявая машына можа развіваць хуткасць да больш за 100 кіламетраў на гадзіну і мае запас ходу больш за 500 кіламетраў на адной запраўцы.
Зенітны комплекс Avenger выпускаецца з 1984 года, яго маюць на ўзбраенні арміі ЗША, Кітая, Чылі, Саудаўскай Аравіі і Літвы.
Цяпер чытаюць
«Усё так ці інакш будзе вырашацца на полі бою». Чым будзе займацца новая кіраўніца Місіі дэмакратычнай Беларусі ва Украіне?9
Каментары