Навукоўцы NASA здабылі кісларод з імітацыі месяцовага грунту
Касмічнае агенцтва спадзяецца, што будучыя астранаўты змогуць выкарыстоўваць гэтую тэхналогію для доўгатэрміновага жыцця на Месяцы ў рамках праграмы Artemis.
НАСА зрабіла вялікі крок наперад на шляху ўстанаўлення чалавечай прысутнасці на Месяцы, здабыўшы кісларод з імітацыі месяцовага грунту ва ўмовах, падобных да навакольнага асяроддзя Месяца. Падчас нядаўняга выпрабавання ў Johnson Space Center у Х'юстане навукоўцы ўпершыню змаглі вырабіць у вакуумным асяроддзі кісларод з грунту, абвясціла касмічнае агенцтва.
Гэта стала магчымым дзякуючы таму, што рэгаліт (іншая назва месяцовага (і не толькі) грунту) змяшчае злучэнні, якія патэнцыйна могуць быць выкарыстаныя для вытворчасці кіслароду з дапамогай сонечнага выпраменьвання, тлумачыць Gizmodo. Каб праверыць гэта, каманда навукоўцаў стварыла дробназярністы грунт для мадэлявання рэгаліту.
Выкарыстоўваючы магутны лазер, які імітаваў цяпло ад канцэнтратара сонечнай энергіі (які падобны да павелічальнай лінзы), каманда расплавіла аналаг рэгаліту. Пасля таго, як грунт быў нагрэты, навукоўцы выявілі вокіс вугляроду з дапамогай спецыяльнага прыбора MSolo, які быў адмыслова распрацаваны для пошуку вады на Месяцы.
Выпрабаванне было праведзена ў спецыяльнай сферычнай камеры, вядомай як брудная цеплавая вакуумная камера. Сам працэс награвання грунту і здабычы кіслароду адбываўся ўнутры вуглетэрмічнага рэактара — прылады, у якой выкарыстоўваюцца высокія тэмпературы для вытворчасці вокісу вугляроду або дыяксіду вугляроду на Зямлі. Такія рэактары выкарыстоўваюцца, напрыклад, пры вытворчасці сонечных батарэй і сталі. Цяпер жа рэактар быў упершыню выкарыстаны ўнутры вакуумнай камеры ва ўмовах, набліжаных да месяцовых, і гэта дало магчымы доказ таго, што ён сапраўды можа працаваць у месяцовым асяроддзі.
Кіраўнік праекта і старшы інжынер NASA распавёў, што тэхналогія штогод можа вырабляць кісларод вагой у некалькі разоў большай за ўласную. Гэта мае дапамагчы падтрымліваць месцы пражывання на Месяцы для будучых астранаўтаў, у той час як NASA і іншыя касмічныя агенцтвы імкнуцца да ўстойлівай прысутнасці на паверхні спадарожніка Зямлі і вакол яго.
Цяпер чытаюць
«Упэўнены, ён і з канём каля аркі пагаварыў». Расійскі журналіст апісаў прыезд Лукашэнкі на парад7
Каментары