Прыпыніў дзейнасць Беларускі інстытут стратэгічных даследаванняў
Аб прыпыненні дзейнасці ўстановы, якая гуртавала беларускіх аналітыкаў больш за 15 гадоў, паведаміў дырэктар Беларускага інстытута стратэгічных даследаванняў (BISS) Пётра Рудкоўскі.
Беларускі інстытут стратэгічных даследаванняў быў створаны ў чэрвені 2007 года групай выбітных навукоўцаў і грамадскіх дзеячаў пры падтрымцы міжнароднай арганізацыі Pact. Яго стваральнікам і першым дырэктарам стаў палітолаг Віталь Сіліцкі, пад кіраўніцтвам якога інстытут набыў прызнанне як месца высакаякаснай грамадска-палітычнай экспертызы.
Пасля заўчаснай смерці Віталя Сіліцкага ў чэрвені 2011 года ў арганізацыі пачалі ўзнікаць канцэптуальныя і персанальныя спрэчкі, тым не менш інстытут надалей меў інстытуцыйнае фінансаванне і меў магчымасць паўнавартасна функцыянаваць як арганізацыя.
Але з цягам часу супярэчнасці ў асяроддзі аналітыкаў нарасталі, а разам з тым меншала донарская падтрымка інстытуцыі.
Урэшце да 2017 года BISS аказаўся ў глыбокім фінансавым і арганізацыйным крызісе. Ад сакавіка 2017 да сакавіка 2018 года ў інстытуце практычна ніякая дзейнасць не вялася.
У сакавіку 2018 года дырэктарам-валанцёрам BISS пагадзіўся стаць Пётра Рудкоўскі. Валанцёрскае дырэктарства азначала, што ў яго не было заробку, адпаведна, і набор абавязкаў быў вельмі абмежаваны, а фактычна змяшчаў толькі адзін акрэслены абавязак: удзел у напісанні праектных заявак і рэалізацыі праектаў.
Стартавыя ўмовы, як падкрэслівае Рудкоўскі, былі вельмі кепскімі, але дзякуючы маральнай, а часам і матэрыяльнай падтрымцы добрых людзей, а таксама гатоўнасці некаторых экспертаў супрацоўнічаць без гарантыі заробку цягам аднаго года арганізацыя практычна выйшла з крызісу і ўступіла на этап развіцця.
Але наступныя абставіны, якія Рудкоўскі падрабязна распісвае, гэтаму развіццю зусім не спрыялі, і таму зараз інстытуцыя мусіць, як ён выказаўся, «вандраваць у архіў гісторыі».
Цяпер чытаюць
«Я сказаў на відэа, што мяне не катуюць — на той момант гэта было праўдай. А пасля мяне білі дзве гадзіны». Украінскі журналіст два гады правёў у расійскім палоне — вось што ён перажыў1
Каментары