Папа Францішак прызнаў недарэчнасць згадкі пра расійскіх імператараў у сваёй прамове
Папа Францішак патлумачыў, што меў на ўвазе, калі казаў пра «вялікую Расію» перад расійскай моладдзю 25 жніўня. Пра Пятра I і Кацярыну II ён, маўляў, успомніў са школьнага курса гісторыі, і, мабыць, гэта згадка «не была ўдалай». Пра гэта Папа сказаў падчас размовы з журналістамі на борце самалёта, калі вяртаўся з Манголіі, паведамляе Vatican News.
Францішак растлумачыў, што заахвочваў тады рускую моладзь берагчы спадчыну сваёй радзімы, «таму што руская спадчына вельмі добрая і вельмі прыгожая». А каб растлумачыць, пра якую спадчыну ідзе гаворка, пантыфік і звярнуўся да ідэі «вялікай Расіі». Але, маўляў, «я не меў на ўвазе імперыялізм, калі гэта сказаў. Я казаў пра культуру».
«Да прыкладу, у галіне літаратуры, у галіне музыкі, аж да Дастаеўскага, які сёння гаворыць нам пра сталы гуманізм. Каб яны ўзялі на сябе гэты гуманізм, які развіўся ў мастацтве і літаратуры. Гэта другі аспект таго, што я казаў пра спадчыну…
Трэці, відаць, не быў удалы. Гаворачы пра вялікую Расію, магчыма, не столькі ў геаграфічным сэнсе, колькі ў культурным, мне ўспомнілася тое, чаму нас вучылі ў школе: Пётр I, Кацярына II. І тут выплыў гэты трэці элемент, мабыць, не зусім правільны. Не ведаю. Хай гісторыкі скажуць. Але гэта прыйшло мне да галавы, таму што я вывучаў так у школе».
У той жа час Францішак перакананы, што «руская культура мае прыгажосць, мае вялікую глыбіню, і не варта яе сціраць з-за палітычных праблем».
Нагадаем, што, выступаючы перад удзельнікамі Х Усерасійскага дня каталіцкай моладзі ў Санкт-Пецярбургу 25 жніўня, Папа Францішак сказаў сярод іншага наступнае:
«Ніколі не забывайце пра спадчыну. Вы — нашчадкі вялікай Расіі: вялікай Расіі святых, кіраўнікоў, вялікай Расіі Пятра І, Кацярыны II, той імперыі — вялікай, адукаванай, вялікай культуры і вялікай чалавечнасці. Ніколі не адмаўляйцеся ад гэтай спадчыны. Вы — нашчадкі вялікай Матухны Расіі, крочце наперад з гэтым. І дзякуй вам, дзякуй за ваш спосаб быць, за ваш спосаб быць рускімі».
Гэтыя словы выклікалі вялікі розгалас і скандал, на іх сярод іншага афіцыйна адрэагавала МЗС Украіны.
Цяпер чытаюць
Офіс пра скандал з Ціханоўскім: Брытанская віза была аплачаная, але ён так і не падаўся на здачу адбіткаў пальцаў15
Каментары