У мегапапулярным рэстаране скандал: на відэа трапілі вытанчаныя здзекі з памочніка кухара
31-гадовы Арэльен Ларжо кіраваў рэстаранам прэстыжнага Hotel du Palais на французскім курорце Біярыц з сакавіка 2020 года і паспеў зарабіць для яго зорку Michelin. Пакуль не здарыўся ганебны эпізод.
Арэльен Ларжо быў зоркай кухарскай справы. Фота: Emilie Drouinaud / Sud Ouest
Вядомы кухар звольніўся пасля скандальнага абраду ініцыяцыі.
Як паведаміла французская газета Sud Ouest, памочнік кухара ў рэстаране прэстыжнага Hotel du Palais на французскім курорце Біярыц некалькі гадзін прасядзеў прывязаны да крэсла з яблыкам у роце і морквай у заднім праходзе.
За ўсім гэтым назіралі іншыя працаўнікі кухні, уключаючы самога Арэльена Ларжо. Відэа выклалі ў інтэрнэт (але потым прыбралі). Мяркуецца, што гэта быў своеасаблівы працэс ініцыяцыі новага працаўніка.
У Францыі любыя абрады ініцыяцыі забароненыя, але такая практыка мае месца ў некаторых рэстаранах. Часам іх апраўдваюць: маўляў, гэта праверкі стрэсаўстойлівасці маладога персаналу.
Hyatt, уладальнік Hotel du Palais, асудзіў інцыдэнт, заявіўшы, што ён супярэчыць іх прынцыпам. Кампанія ўжо распачала расследаванне здарэння.
Hotel du Palais — вядомы пяцізоркавы гатэль на беразе мора ў Біярыцы.
У мэрыі Біярыца ад каментароў пакуль устрымаліся.
Каментары