Следчы камітэт нарэшце раскрыў забойства 25-гадовай даўніны. Вось толькі караць ужо няма каго
Прэс-служба Следчага камітэта расказала пра чалавечыя парэшткі, якія нядаўна неспадзявана адкапаў на тэрыторыі свайго падворка жыхар Веткаўскага раёна. Гэтая страшная знаходка дала нітачку да раскрыцця злачынства, здзейсненага ажно 25 гадоў таму, у 1998 годзе.
Як удалося вызначыць пасля праведзеных экспертыз, знойдзенае цела належала 24-гадоваму ўраджэнцу Жлобінскага раёна, які знік без вестак чвэрць стагоддзя таму.
Незадоўга перад знікненнем хлопец якраз адбыў «хімію» за «выкрадзены на прадпрыемстве кабель». У чэрвені 1998-га ён наведаў сваіх сваякоў у Жлобіне і Мінску і падзяліўся з імі планамі на найбліжэйшую будучыню. Яны былі звязаныя з продажам малінаў у Маскве, для чаго мужчына пазычыў грошай на закупку ягад у сваіх сясцёр. Пасля таго яго ніхто не чуў і не бачыў.
Пасля знаходжання на падворку ў Веткаўскім раёне парэшткаў цела і выяўлення, што смерць чалавека была гвалтоўнай, Следчы камітэт распачаў крымінальную справу па факце забойства. Пашукаўшы, хто ў гэтым доме жыў раней, адразу выйшлі на след ураджэнца Расіі, які валодаў нерухомасцю з сярэдзіны 1990-х да лістапада 1998 года.
Высветлілася, што пасля продажу гэтага дома мужчына пераехаў да бацькоў у Гомельскі раён, дзе «сістэматычна збіваў маці» і «сыходзіў у запоі». За гэтае рукапрыкладства ён трапіў пад следства, збег у Расію, дзе ў 2007 годзе памёр.
«Праведзеная карпатлівая праца па ўстанаўленні невідавочнай сувязі паміж загінулым і гэтым жыхаром Гомельскага раёна. Здабытыя звесткі, што абодва некаторы час выконвалі розныя віды работ на адным прадпрыемстве — ААТ «Гомельская райсельгасхімія».
На паказанай сёстрам загінулага фатаграфіі падазраванага яны пазналі напарніка брата па «ягадным бізнэсе», апісалі яго аўтамабіль. Устаноўлены і іншыя сведкі іх знаёмства», — расказалі падрабязнасці ў СК.
У выніку следства прыйшло да высновы, што ў забойстве маладога хлопца быў якраз і вінаваты гэты чалавек. Паводле паказанняў сведкаў, абодва мужчыны, будучы ў стане алкагольнага ап'янення, былі схільныя да «выбухаў беспадстаўнай агрэсіі».
Паводле версіі следства, мужчыны «разышліся ў поглядах на супольны гандаль ягадамі», і ў прыступе гневу адзін з іх забіў другога. Пасля таго мужчына закапаў цела небаракі ў двары і неўзабаве выставіў дом на продаж. Цікава, што, прадаючы дом, мужчына сказаў купцам, што на дваровай тэрыторыі «закапаны здохлы конь».
У сувязі са смерцю галоўнага падазраванага крымінальная справа была спыненая.
У Маскве затрымалі беларуса, які 15 гадоў таму забіў свайго земляка, але адсядзеў па іншым эпізодзе
У Магілёве раскрылі рэзананснае забойства 11-гадовай дзяўчынкі, што адбылося 25 гадоў таму
Раскрылі забойства касіркі мінскага абменніка 14-гадовай даўніны
Парэшткі мінскага бізнэсмена знайшлі праз 25 гадоў пасля яго знікнення
Цяпер чытаюць
Стала вядома, хто лётаў на Шры-Ланку разам з Анжалікай Мельнікавай і яе агентам9
Каментары