Ціханоўская прадставіла тры магчымыя сцэнары перамен у Беларусі
Тры магчымыя сцэнары перамен у Беларусі прадставіла дэмакратычная лідарка Святлана Ціханоўская 6 мая ў Коўне, выступаючы з лекцыяй аб рэгіянальнай стабільнасці і бяспецы ва Універсітэце Вітаўта Вялікага, піша «Позірк».
Палітык адразу абмовілася, што «сёння складана прадказаць, як будзе развівацца сітуацыя».
Разам з тым, паводле першага сцэнарыя, які прадугледжвае перамогу Украіны ў развязанай супраць яе Расіяй вайне, «Беларусь атрымлівае яшчэ адзін гістарычны шанец».
«Чым слабейшы Пуцін, тым слабейшы Лукашэнка, — канстатавала яна. — Без падтрымкі Расіі рэжым Лукашэнкі не зможа ўтрымаць уладу, што адкрывае для нас акно магчымасцяў. Таму дапамога Украіне для перамогі ў вайне — наш нацыянальны інтарэс».
Другі сцэнар прадугледжвае «кампраміс або здзелку з Пуціным, якая замарозіць канфлікт», і такога развіцця падзей, паводле слоў Ціханоўскай, «пажадана пазбегнуць».
«У такой сітуацыі ёсць рызыка, што ў Беларусі захаваецца статус-кво, і Беларусь застанецца пад кантролем Расіі, — папярэдзіла палітык. — У абодвух дыктатараў зʼявіцца час, каб умацаваць сваю ўладу і падрыхтавацца да новага нападу. Такі сцэнар небяспечны не толькі для беларускай незалежнасці, але і для міру ў рэгіёне».
Трэці сцэнарый прадугледжвае наступленне перамен у Беларусі да перамогі Украіны. Яна падкрэсліла, што «рэжым Лукашэнкі значна менш стабільны, чым здаецца».
«Мы не ведаем, што можа паслужыць штуршком: эканамічны крызіс, незадаволенасць насельніцтва ці раскол эліт, — заявіла яна. — Нават адсутнасць дыктатара на працягу некаторага часу стварае вакуум улады і паралізуе сістэму. Такія змены могуць стаць пераломным момантам».
«Ва ўсіх трох сцэнарах існуе мноства пераменных. Мы не ведаем, як і калі адбудуцца змены. Але мы павінны быць гатовы скарыстаць магчымасць, калі яна зʼявіцца», — падкрэсліла Ціханоўская.
Галыгіна прымусілі апраўдвацца за зварот да сілавікоў у 2020-м17
Каментары