Новым кіраўніком урада Шатландыі абралі памяркоўнага прыхільніка незалежнасці
Парламент Шатландыі прызначыў новага лідара Шатландскай нацыянальнай партыі Джона Суіні першым міністрам урада гэтай часткі Вялікабрытаніі. 60-гадовы Суіні з'яўляецца прыхільнікам поўнай незалежнасці Шатландыі ад Лондана, аднак выступае за паступовы, без рэзкіх рухаў, выхад з Вялікабрытаніі, піша Бі-бі-сі.
Папярэдні першы міністр і лідар Шатландскай нацыянальнай партыі Хамза Юсаф на мінулым тыдні падаў у адстаўку. Пасля развалу ўрадавай кааліцыі з зялёнымі яму пагражалі адразу два вотумы недаверу.
Такім чынам, Суіні ўзначаліць урад меншасці і для прыняцця рашэнняў будзе вымушаны спадзявацца на падтрымку апазіцыі: для большасці яго партыі не хапае двух мандатаў. Як чакаецца, Суіні будзе афіцыйна прыведзены да прысягі ў сераду.
Джон Суіні ўжо ўзначальваў Шатландскую нацыянальную партыю — у 2000-2004 гадах, калі яна была ў апазіцыі. Да і пасля гэтага ён быў дэпутатам розных узроўняў, а з 2007 года, калі ягоная партыя прыйшла да ўлады, займаў розныя пасады ва ўрадзе, адзін час быў віцэ-прэм'ерам.
Праграмная мэта Шатланскай нацыянальнай партыі — незалежнасць Шатландыі, і ўсе вядучыя фігуры ў партыі нязменна клянуцца ў вернасці гэтай мэты, але ў той жа час сярод іх існуюць розныя ўяўленні адносна таго, як менавіта да гэтай мэты ісці.
Джон Суіні належыць да лагера прыхільнікаў паступовага руху да незалежнасці шляхам пашырэння аўтаноміі Шатландыі ў рамках Злучанага Каралеўства.
У 2014 годзе, калі Суіні быў міністрам фінансаў і эканомікі ва ўрадзе тагачаснага лідара Шатландскай нацыянальнай партыі Алекса Сэлманда, Шатландыя са згоды Лондана правяла рэферэндум аб незалежнасці. Прыхільнікі аддзялення прайгралі з розніцай у 10 працэнтных пунктаў.
Цяпер чытаюць
Памятаеце фота з мускулістым беларусам, які ў 2020-м ішоў у счэпцы з амапаўцам? Цяпер ён здымаецца ў кіно ў Англіі1
Каментары