Валерый Сахашчык зарэгістраваў новую кампанію і пашырыў свой бізнэс на Бельгію
Валерый Сахашчык нядаўна пакінуў пасаду «міністра абароны» ў Аб'яднаным пераходным кабінеце, заявіўшы сярод іншага, што «прыняў рашэнне засяродзіцца на развіцці свайго бізнэсу». Выданне Plan B. даведалася, у якім стане цяпер гэтая сфера, у якую ўкладае свае сілы і энергію былы вайсковец і палітык.
Замест працягу палітычнай дзейнасці стала вядома, што Сахашчык зарэгістраваў новую бізнэс-структуру і нарошчвае партфель заказаў за кошт новага рынку — бельгійскага.
Цяпер ён валодае трацінай доляў і з'яўляецца старшынёй праўлення сямейнай групы кампаній SK — Bud & Sahaty — найбуйнейшага будаўнічага бізнэсу сярод больш чым 400 аналагічных кампаній беларусаў у Польшчы і прыкладна 500 ва ўсім Еўрасаюзе.
Як высветліў Plan В., па выніках 2023 года галаўная структура сямейнага бізнэсу Сахашчыкаў — кампанія Sahaty — зарабіла амаль 15 млн еўра выручкі і 150 тыс. еўра чыстага прыбытку. Па выручцы — гэта першае месца сярод усіх прыватных беларускіх будаўнічых кампаній не толькі ў Польшчы, але і ў ЕС. І, прынамсі, адно з месцаў у топ-50 усіх бізнэсаў суайчыннікаў у Еўропе.
У параўнанні з папярэднім перыядам фінансавыя паказчыкі Sahaty скараціліся. У 2022-м было, адпаведна, 20 млн і 200 тыс. еўра. Але рэгрэс характэрны для ўсяго беларускага будаўнічага, ды і не толькі бізнэсу ў Польшчы, апрача толькі IT-галіны.
Гэтыя аб'ёмы летась сям'я Сахашчыка зарабіла на больш чым 50 будоўлях, у асноўным на субпадрадзе. У большасці яны былі ў Польшчы, але таксама ў Германіі і ў Бельгіі, рынак якой пачаў асвойвацца з канца 2023-га.
У Польшчы Sahaty будаваў жылыя комплексы ў Гданьску, Варшаве, Кракаве, Познані, Хожаве. У грамадзянскім сектары фірма ўдзельнічала ва ўзвядзенні студыі на тэрыторыі штаб-кватэры Польскага тэлебачання (TVP Warszawa), будынкаў музычных акадэмій у Быдгашчы і Катавіцах, транспартна-перасадачнага вузла ў Забжэ, чыгуначнага вакзала ў Тлушчы.
Былі ў партфелі і прамысловыя аб'екты: пашырэнне кандытарскай фабрыкі Lotte Wedel у Варшаве і ўзвядзенне цэха буйнога вытворцы бляшанак BallPackaging у Любліне.
У Германіі, дзе дзейнічае даччыная кампанія Sahaty, беларускія брыгады працавалі ў Берліне, Мюнхене, Мюнстары, Гановеры і іншых гарадах краіны.
У 2024-м Сахашчык зарэгістраваў новую будаўнічую кампанію Chicago Urban Development, завяршае пачатыя будоўлі і пашырае партфель заказаў. З польскіх самы знакавы — гэта ўдзел ва ўзвядзенні трэцяй чаргі тэрмінала звадкаванага газу імя Леха Качынскага ў Свінавусці, які забяспечвае незалежнасць Польшчы ад расійскага газу.
Там жа, на ўзбярэжжы Балтыкі, Sahaty будуе жылыя комплексы і гатэлі, у іншых частках Польшчы і ў Германіі — дамы і грамадзянскія аб'екты.
У пачатку бягучага года кампанія здала першы аб'ект на новым рынку — у Бельгіі, а таксама атрымала ў гэтай краіне новыя заказы. Самы значны — удзел у будаўніцтве буйнога жылога комплексу ў Мехелене.
Сахашчык: Я стварыў падраздзяленне, якое 15 месяцаў ваявала без ратацыі на перадавой. І ніводнага загінулага
Ціханоўская пра адстаўку Сахашчыка: з Валерыем Сцяпанавічам застаемся ў нармальных адносінах
«Міністр абароны» Валерый Сахашчык заявіў пра выхад з Аб’яднанага пераходнага кабінета
«Беларускі Чэрчыль» — усё? Ці застанецца Сахашчык у камандзе Ціханоўскай пасля канферэнцыі ў Вільні
Замест Сахашчыка ў Аб'яднаным пераходным кабінеце цяпер будзе Кабанчук
Без Пазняка і Сахашчыка, з нервовымі дыскусіямі паміж Латушкам і Ягоравым. Як праходзіла канферэнцыя «Новая Беларусь»
Каментары