Актыўна абмяркоўваюць незвычайны вобраз канцлера Германіі Олафа Шольца, які прыехаў ва Украіну з таямнічай валізкай і сам без дапамогі ахоўнікаў нёс яе ў руках. Што там было ўнутры?
Многія звярнулі ўвагу на тое, што канцлер Германіі Олаф Шольц прыехаў у Кіеў з вялікай алюмініевай валізкай, якую ў нязвыклай для першых асоб манеры нёс у руках самастойна, што выклікала шматлікія пытанні і жарты ў нямецкіх і ўкраінскіх сацсетках, піша выданне Der Spiegel.
На супольнай прэс-канферэнцыі з прэзідэнтам Украіны Уладзімірам Зяленскім журналісты вырашылі падняць тэму таямнічай валізкі і пацікавіліся ў канцлера Германіі, што там унутры.
«Што ў валізцы? Грошы, зброя ці можа міні-Taurus?» — спыталі ўкраінскія журналісты.
Шольц, звычайна стрыманы, у адказ пажартаваў: «Гэта проста рэчы для падарожжа: бялізна і ўсё, што трэба ў дарозе».
Зяленскі адрэагаваў на дыялог смехам, але гэтая сцэнка толькі падкрэсліла, што чаканні Украіны ў адносінах да Германіі застаюцца вельмі высокімі, асабліва цяпер, калі вайна з Расіяй працягваецца ўжо трэці год, адзначае Der Spiegel.
У сваю чаргу, Шольц заявіў, што ўжо ў снежні Германія перадасць Украіне шостую сістэму IRIS-T — вельмі эфектыўны комплекс супрацьпаветранай абароны кароткага радыуса дзеяння, а таксама пускавыя ўстаноўкі для Patriot — амерыканскай СПА з вялікім радыусам дзеяння. Акрамя таго, Украіна атрымае самаходныя зенітныя ўстаноўкі Gepard, якімі збіваюць дроны, і верталёты Sea King.
Пры гэтым нямецкі канцлер падкрэсліў, што Германія не аслабіць дапамогу, назваўшы «недапушчальнымі» абстрэлы расіянамі ўкраінскай энергетычнай інфраструктуры.
Нагадаем, Олаф Шольц прыбыў у сталіцу Украіны ў панядзелак без папярэдніх анонсаў. Гэта ўжо другі візіт Шольца ва Украіну пасля пачатку поўнамаштабнага ўварвання Расіі ў 2022 годзе. Раней канцлер наведваў Кіеў у чэрвені 2022 года, калі стала ясна, што Украіна выстаяла, вытрымала страшны ўдар насуперак усім чаканням. Цяперашні візіт адбыўся пасля нядаўняй размовы Шольца з Пуціным.
Каментары