COVID-19 — хутчэй за ўсё, лабараторнага паходжання. Сенсацыйны вынік расследавання
Спецыяльны падкамітэт па пандэміі каранавіруса Палаты прадстаўнікоў ЗША завяршыў двухгадовае расследаванне па пытаннях пандэміі COVID-19. Кангрэсмены прыйшлі да высновы, што абавязковае нашэнне масак было, хутчэй, непатрэбным, а лакдаўны — шкоднымі. Многія навукоўцы лічаць такія высновы палітычна матываванымі.
Вынікам стаў даклад пад назвай «Аналіз дзеянняў падчас пандэміі COVID-19: вынесеныя ўрокі і шлях наперад». У сераду, 4 снежня, падкамітэт правядзе карэкцыю канчатковага даклада і афіцыйна накіруе яго Кангрэсу.
Знаёмім з галоўнымі вывадамі расследавання.
COVID-19 быў штучна створаны? Пяць аргументаў «за»
Паводле рапарта, COVID-19, «хутчэй за ўсё, узнік у лабараторыі ва Ухані, Кітай». Вось асноўныя аргументы на карысць гэтай версіі:
- Вірус мае біялагічную асаблівасць, якая не сустракаецца ў прыродзе.
- Даныя паказваюць, што COVID-19 распаўсюдзіўся з адной крыніцы заражэння.
- Ухань з’яўляецца месцам размяшчэння найважнейшай кітайскай лабараторыі для даследаванняў SARS, якая вядомая правядзеннем эксперыментаў з павышэннем функцый вірусаў пры недастатковым узроўні біялагічнай бяспекі.
- За некалькі месяцаў да афіцыйнага выяўлення COVID-19 навукоўцы з Уханьскага інстытута вірусалогіі захварэлі на вірус, падобны да гэтага віруса.
- Калі б існавалі доказы натуральнага паходжання віруса, яны найпраўдападобней ужо былі б знойдзены.
СААЗ дзейнічала пад ціскам Кітая, а локдаўны былі непатрэбныя
Рапарт востра крытыкуе Сусветную арганізацыю аховы здароўя.
«Рэакцыя СААЗ на пандэмію COVID-19 была поўнай няўдачай, бо арганізацыя паддалася ціску з боку Камуністычнай партыі Кітая і паставіла палітычныя інтарэсы Кітая вышэй за свае міжнародныя абавязкі», — гаворацца ў ім.
Падкамітэт таксама крытычна ацаніў некаторыя меры, прынятыя падчас пандэміі COVID-19, такія, як сацыяльнае дыстанцыяванне, абавязковыя маскі і лакдаўны.
У дакладзе сцвярджаецца, што рэкамендацыя трымаць адлегласць 6 футаў (прыкладна 1,8 метра) была адвольнай і навукова неабгрунтаванай.
Што да масак, аўтары даклада звяртаюць увагу на тое, што іх эфектыўнасць сумнеўная, а амерыканскія чыноўнікі аховы здароўя змянялі свае пазіцыі па гэтым пытанні «без ясных навуковых абгрунтаванняў».
(Для даведкі: апублікаваны ў маі бягучага года метааналіз больш за 400 даследаванняў, праведзены Оксфардскім універсітэтам, паказаў, што маскі і рэспіратары ўсё ж эфектыўна зніжаюць перадачу інфекцый дыхальных шляхоў, у тым ліку COVID-19.)
Паводле даклада, працяглыя лакдаўны нанеслі вялікую шкоду для эканомікі і псіхічнага здароўя людзей, асабліва маладых. Замест таго, каб засяродзіцца на абароне найбольш уразлівых груп, дзяржаўная палітыка прымусіла мільёны людзей адмовіцца ад важных аспектаў здаровага жыцця, лічаць аўтары даклада.
Імавернасць палітычнага складніку
У дакладзе дзеянні адміністрацыі Джо Байдэна ў справе COVID-19 галоўным чынам крытыкуюцца, у той час як рашэнні адміністрацыі Дональда Трампа амаль заўсёды прадстаўляюцца ў пазітыўным святле. Гэта стварае ўражанне прадузятасці, прынамсі ў пэўных частках даклада.
Варта нагадаць, што падкамітэт быў створаны дэмакратамі ў 2020 годзе па ініцыятыве спікеркі Палаты прадстаўнікоў Нэнсі Пэласі.
У перыяд дэмакратычнай большасці планавалася, што асноўнай задачай падкамітэта будзе забеспячэнне празрыстасці ў выкарыстанні сродкаў дапамогі ў сувязі з пандэміяй.
Аднак у пачатку 2023 года падкамітэт быў рэарганізаваны. Пад кіраўніцтвам рэспубліканскага кангрэсмена Брэда Вэнстрапа абшар яго задач пашырыўся: дадаўся аналіз паходжання віруса, выдаткаў урада на барацьбу з пандэміяй, а таксама рэалізацыі мер аховы здароўя, такіх як абавязковыя маскі і вакцынацыя.
Цяпер чытаюць
Хто той неадэкватны беларус, які ляснуў дзіцятка галавой аб падлогу ў маскоўскім Шарамеццеве5
Каментары