«У нас былі складаныя адносіны пасля нараджэння дзіцяці».
У новым выпуску ТОКу вядоўца ранішняга шоу «Звычайная раніца» Марына Ментусава расказала пра свайго былога мужа — расійскага прадзюсара і рэжысёра Аляксандра Сёміна — і патлумачыла, чаму рассталася з ім.
Да Марыны Сёмін быў у шлюбе з актрысай Эвелінай Блёданс, у іх нарадзіўся хлопчык з сіндромам Даўна.
Па словах Марыны, да сустрэчы з ёй Сёмін ужо даўно быў у разводзе, але значную частку свайго часу праводзіў і працягвае праводзіць з сынам, займаецца яго развіццём і адаптацыяй.
Такі клопат пра дзіця, па словах Марыны, яе зачараваў:
«Я падумала, што мне ад такога чалавека не грэх і самой мець дзіця. (…) Я ўпершыню ўбачыла тады, што ёсць чалавек, для якога таксама важная каштоўнасць, вартасць жыцця».
Цяпер Марына адна гадуе сумесную з Сёміным дачку Веру, а на пытанне, чаму ж яны рассталіся, адказвае, што на гэта паўплываў «комплекс усяго». І ў першую чаргу згадвае сваю пасляродавую дэпрэсію.
«У нас былі складаныя адносіны пасля нараджэння дзіцяці. Гэта такая вялікая асабістая драма для нас дваіх, якую мы доўга перажывалі, доўга абмяркоўвалі. Мы хадзілі ў сямейную тэрапію, мы хадзілі ў асабістую тэрапію. Мы рабілі ўсё як дарослыя людзі.
І рассталіся вялікімі сябрамі дзякуючы гэтаму. Дзякуючы таму, што зразумелі, што гэтак больш працягвацца не можа. Мы проста адзін аднаго знішчаем», — шчыра расказвае Марына і сцвярджае, што працягвае падтрымліваць добрыя адносіны з Сёміным:
«Я думаю, што мы любім адно аднаго менавіта як бацькі Веры. Я разумею, што лепшага бацькі для Веры быць не можа. Саша — найлепшы тата для Веры. (…) Ніколі ніякага дрэннага слова ад мяне яна не пачуе ў яго бок».
Ментусава адзначае, што шлюб з Сёміным забяспечыў ёй «цалкам іншы» ўзровень камфорту і «прыгожае жыццё». Мужчына прымусіў яе звольніцца з працы, што дало магчымасць займацца цяжарнасцю, падрыхтоўкай да родаў і выхаваннем дачкі ў першыя месяцы. Аднак гэта мела і іншыя наступствы.
Марына прызнаецца: «Я назапасіла невялікую падушку бяспекі да нараджэння Веры, 3-4 тысячы долараў. Тады гэта была больш-менш нейкая сума. Я ўсю яе патраціла, таму што мне было сорамна прасіць грошы. Я патраціла на падрыхтоўку да родаў. У выніку я да нараджэння Веры апынулася ў поўнай эканамічнай залежнасці».
Нягледзячы на тое, што ёй «пашанцавала на добрага мужчыну», бо для Сёміна «ўвогуле гвалт непрымальны ў любым выглядзе», па словах Ментусавай, у пэўны момант яна зразумела, што падладжваецца пад мужа, адчула сябе залежнай:
«У нейкіх мікрамомантах, у мікрасітуацыях я ўсё адно адчуваю сябе залежнай. Што я раюся часцей. Што я магу згладжваць нейкія вуглы. Што мая дзёрзкасць і смеласць крыху прытупілася.
І я тады падумала, што мне патрэбны мае грошы. Пачала думаць пра ўласны бізнэс. Прыдумала ідэю. Пачала рабіць кансалтынг па гендарнай роўнасці. Было шчасце і мара. І ўвогуле ўсё пачало складацца. Але потым здарылася вымушаная эміграцыя».
Цяпер чытаюць
Лукашэнка загадаў прышчапляць нелюбоў да Польшчы пачынаючы са школы85
Лукашэнка загадаў прышчапляць нелюбоў да Польшчы пачынаючы са школы
«У выніку ён сказаў мне: «Хопіць мяне шантажаваць, я хачу палюбавацца гэтымі дрэвамі». Аксана Колб расказала, пра што размаўляла са Статкевічам на мяжы88
Каментары