У якіх гарадах Беларусі будуюць найбольш жытла? Розніца паміж усходам і захадам уражвае
Калі за апошнія 10 гадоў у Гродне і Брэсце было ўведзена ў эксплуатацыю больш чым па 2,4 мільёна метраў жытла, то ў блізкіх па насельніцтве Віцебску і Магілёве — прыкладна па 1,5 мільёна метраў.
Мінск
Летась, паводле Белстата, у Мінску ўвялі ў эксплуатацыю 662 тысячы квадратных метраў жытла. Гэта адзін з найніжэйшых паказчыкаў за апошнія 10 гадоў. Менш было толькі ў 2019-м — 511 тысяч квадратных метраў.
Пікавым стаў 2014 год.
У параўнанні з 2014 годам аб'ём уводу новага жытла ў эксплуатацыю ў 2024-м знізіўся ў два разы — з 0,66 м² да 0,33 м² на аднаго жыхара сталіцы.
Брэст
У Брэсце летась здалі 198 тысяч метраў жытла. Цягам апошніх 10 гадоў пікавым быў 2015 год — тады ў абласным цэнтры ўвялі ў эксплуатацыю 316 тысяч метраў жытла.
Найменшыя паказчыкі ў Брэсце былі зафіксаваныя ў 2021-м — 178 тысяч квадратаў.
Летась у Брэсце здалі па 0,57 квадрата на аднаго гараджаніна.
Віцебск
У Віцебску летась здалі ў эксплуатацыю 150 тысяч квадратных метраў жытла. Гэта па 0,42 квадрата новаўведзенага жытла на аднаго жыхара.
У 2014 годзе, пікавым для Віцебска, была 161 тысяча.
А найгоршым аказаўся 2023 год з 108 тысячамі метраў жытла.
Гомель
У другім па колькасці насельніцтва горадзе Беларусі летась увялі ў эксплуатацыю 158 тысяч квадратаў жытла. У пікавым 2014-м была 271 тысяча.
У пераводзе на колькасць насельніцтва Гомель летась меў па 0,31 м² новага жытла на аднаго жыхара, што амаль як у сталіцы.
Гродна
Летась у гэтым абласным цэнтры ўвялі ў эксплуатацыю амаль 240 тысяч квадратаў жытла. Найлепшымі за апошнія 10 гадоў былі 2013 і 2014 гады, калі ў Гродне здавалі па 276 тысяч метраў новабуду.
Найменшыя аб'ёмы ўводу жытла ў Гродне за гэты перыяд былі ў 2017-м — 172 тысячы метраў.
Летась, як і пазалетась, Гродна лідзіруе па колькасці новых метраў жытла на душу насельніцтва — 0,66 м² на чалавека.
Магілёў
У Магілёве летась здалі ў эксплуатацыю 150 тысяч метраў жытла. Гэта па 0,42 м² новага жытла на аднаго жыхара — столькі ж, колькі пабудавалі ў Віцебску.
Пікавым за апошнія 10 гадоў у Магілёве аказаўся 2018 год з паказчыкам 158 тысяч метраў.
Найменшыя аб'ёмы здачы жытла ў Магілёве за гэты перыяд былі ў 2019-м — 144 тысяч метраў жытла.
Захад vs Усход
Даныя Белстата па колькасці ўведзеных у эксплуатацыю метраў жытла выразна паказваюць, наколькі моцна адрозніваецца сітуацыя з будаўніцтвам у абласных цэнтрах на ўсходзе і захадзе краіны.
Калі за апошнія 10 гадоў у Гродне і Брэсце было ўведзена ў эксплуатацыю больш чым па 2,4 мільёна метраў жытла, то ў блізкіх па насельніцтве Віцебску і Магілёве — прыкладна па 1,5 мільёна метраў.
Двухмільённую планку за дзесяць гадоў пераадолеў большы па насельніцтве Гомель. Калі супастаўляць з колькасцю жыхароў, то ў Гомелі сітуацыя з уводам новага жытла падобная да той, што ў Віцебску і Магілёве.
Каментары