Плача, але едзе ў Кенію ўслед за мужам: лукашэнкаўскі пул застаўся без адданай супрацоўніцы

37-гадовая Вераніка Бута працуе на БТ, яна карэспандэнтка Агенцтва тэленавінаў. Па кар'ернай лесвіцы яна пайшла ў 2020 годзе — калі многія калегі звальняліся ў знак пратэсту. Цяпер Бута катаецца ўслед за Лукашэнкам і асвятляе яго сустрэчы. Аднак неўзабаве яе чакае вялікае падарожжа, ад якога яна, выглядае, не ў захапленні.

Вераніка Бута нарадзілася ў Слоніме. Кажа, што марыла пра кар’еру дыпламаткі і збіралася паступаць на факультэт міжнародных адносін. Але калі пабачыла ў слонімскай раёнцы аб'яву пра пошук юных карэспандэнтаў, то вырашыла паспрабаваць свае сілы ў журналістыцы. Некалькі нататак дзяўчыны апублікавалі — і панеслася. Вераніка кажа, што папулярнасць ударыла ёй у галаву і яна вырашыла ісці на спецыяльнасць «міжнародная журналістыка» на факультэт журналістыкі БДУ.

Падчас вучобы Вераніка падпрацоўвала на АНТ і дзвюх радыёстанцыях. Калі пытанне дайшло да размеркавання, дзяўчына выбрала «Радыус FM».

Вераніка захапляецца эзатэрыкай. Яна сцвярджае, што гэта зоркі ёй падказалі, што яна аднойчы трапіць на тэлебачанне. Таму, калі дзяўчыну паклікалі працаваць у Белтэлерадыёкампанію, яна пагадзілася.

У 2020 годзе Вераніку паклікалі ў лукашэнкаўскі пул. Кажа, што, калі атрымала прапанову, супраціўлялася недзе паўгода — бо не была ўпэўнена, што здолее. Але ўрэшце пагадзілася.

Дарэчы, у тым жа 2020 годзе Вераніка праз сваю прапагандысцкую працу і палітычныя погляды страціла шмат блізкіх, у тым ліку найлепшую сяброўку. Бута некалі нават ездзіла ў ЗША, каб пахрысціць яе дзіця і стаць хроснай мамай. Разышлася прапагандыстка і з каханым хлопцам.

Летась яна распавяла пра свой нервовы зрыў на хвалі тых падзей у перадачы «Скажінемолчі» на БТ: «На жаль, у гэту бальніцу мяне прывялі мае сябры. Гэта былі мае знаёмыя, сябры, аднагрупнікі, былыя калегі. Тыя людзі, якім я давярала. У тым ліку гэта быў і на той момант мой малады чалавек. Былі мае блізкія сябры і тыя людзі, якія раней прыходзілі ў мой дом, да маіх бацькоў. Гэта, напэўна, больш за ўсё мяне падкасіла».

Павялічыць

Камунікацыя з сяброўкай урэшце аднавілася, а вось з маладым чалавекам адносіны скончылі назаўсёды. «Магу сказаць яму вялізны дзякуй. Дзякуючы яму я зразумела, які мужчына павінен быць са мной побач. І агулам перагледзела свае погляды на сям'ю, на адносіны», — расказвала супрацоўніка лукашэнкаўскага пула.

Павялічыць

Пытанні з асабістым жыццём Вераніка ўжо вырашыла. У сакавіку 2024 года Бута намякала на свой раман з дырэктарам канала «Беларусь 24» Паўлам Лазавіком. Маўляў, у інстаграме Веранікі падазрона шмат агульных фота з ім, таму можна падумаць, што яны не проста сябруюць. Дзяўчына каментавала сітуацыю какетліва: «Абвяргаць не буду. Але і пацвярджаць таксама».

Але ўжо ў кастрычніку 2024 года Вераніка пабралася шлюбам з іншым. Яе мужам стаў Дзмітрый Красоўскі. Цяпер яму 44 гады.

Апошнія пяць гадоў Красоўскі быў дырэктарам Нацыянальнага агенцтва інвестыцый і прыватызацыі, перад тым працаваў намеснікам дырэктара дэпартамента ў Міністэрстве эканомікі. 

Цяпер жа Лукашэнка прызначыў яго паслом Беларусі ў Кеніі.

Павялічыць

У хуткім часе Красоўскаму давядзецца пераязджаць на іншы кантынент. Вераніка (цяпер яна па пашпарце Красоўская, але ў журналістыцы засталася Бутай) таксама паедзе разам з мужам у Афрыку.

У тэлесюжэце бачна, як яна выцірае слёзы, а яе муж неяк разгублена кажа:

«Нечаканасць для нас і вялікія змены ў жыцці. Перабудова таго, як мы бачылі далейшае наша развіццё сям'і. Але… Мы не першыя, хто з гэтым сутыкаецца. Я думаю, з дапамогай калег мы зможам спланаваць так бліжэйшы час, каб сумяшчаць разумны баланс працы і асабістага жыцця».

• 1
• 2
• 68
• 6
• 3
• 1
• 5
• 0