Ультрамарафон пачаўся ўчора ў Мурманскай вобласці. З-за складаных умоў надвор'я яго хацелі адмяніць, але перадумалі і далі старт. У выніку 6 ліпеня раніцай падчас масавага забегу па гарах у Кіраўску загінулі двое яго ўдзельнікаў.
Падчас ультрамарафону «Хібіны», што праходзіў у Мурманскай вобласці, загінулі два чалавекі — 61-гадовая жыхарка Санкт-Пецярбурга і 47-гадовы масквіч. Яшчэ двое ўдзельнікаў былі шпіталізаваныя ў стане сярэдняй цяжкасці.
Спаборніцтвы распачаліся напярэдадні, калі ўдзельнікі ўжо падняліся ў горы. Аднак надвор’е рэзка пагоршылася: на перавале быў мокры снег, вецер хуткасцю звыш 20 м/с і тэмпература каля нуля.
Паводле папярэдніх звестак, прычынай смерці стала пераахаладжэнне. Удзельнікі вымушаныя былі бегчы па слізкіх камянях і заснежаных цяснінах.
Арганізатары марафону, як сцвярджаецца, за два дні да пачатку разглядалі магчымасць скасаваць мерапрыемства з-за дрэннага прагнозу надвор’я і рэкамендацый МНС.
Усе забегі, запланаваныя на гэты дзень, скасаваныя. Ультрамарафонцаў, якія дабеглі да кантрольнага пункта, цяпер рыхтуюць да эвакуацыі.
Следчы камітэт РФ распачаў крымінальную справу паводле артыкула аб аказанні паслуг, што не адпавядаюць патрабаванням бяспекі для жыцця і здароўя.
Ультрамарафон — гэта від бегавых спаборніцтваў, якія перавышаюць стандартную марафонскую дыстанцыю ў 42 кіламетры. Звычайна гэта забегі на 50, 100, 160 км і больш, або спаборніцтвы, дзе трэба прабегчы як мага большую адлегласць за вызначаны час (напрыклад, за 12 або 24 гадзіны).
Часта ўльтрамарафоны праходзяць па складаных маршрутах: у гарах, па бездарожжы, па пустынях ці ў цяжкіх кліматычных умовах.
Цяпер чытаюць
Ціханоўскі: Я ж не ведаў, што людзі баяцца паказваць твары і баяцца за сваіх сваякоў! Я набіваю гузы сам32
Каментары