У Вільні перавозчыкі зладзілі ціхую акцыю ў сувязі з блакаваннем літоўскіх фур у Беларусі
У Вільні на кальцы праспекта Канстытуцыі сабраліся літоўскія перавозчыкі, каб «ціха» звярнуць увагу на свае праблемы, паведамляе Delfi.lt.
Раніцай 15 лістапада на стаянку прыехалі грузавыя цягачы. Удзельнікі акцыі падкрэслілі, што гэта не пратэст і не мітынг, а «ціхі жалобны сход» з кавай і печывам. Яны, маўляў, не прадстаўляюць ніякай афіцыйнай арганізацыі, але «больш не могуць маўчаць». Мэта — прыцягнуць увагу да літоўскіх фур, што «захраслі» ў Беларусі, і паказаць, што бізнэсу патрэбна падтрымка дзяржавы.
Адзін з кіроўцаў сказаў, што іх машыны засталіся без працы і без прычэпаў, таму яны вырашылі проста сабрацца разам — «як флэшмоб». Ён таксама адзначыў, што ад афіцыйных арганізацый сектара, у тым ліку ад асацыяцыі літоўскіх перавозчыкаў Linava, чакаць дапамогі бессэнсоўна: частка яе кіраўніцтва, на яго думку, больш займаецца палітыкай, чым праблемамі малога бізнэсу.
Іншы перавозчык назваў сустрэчу «жалобным сходам аднадумцаў»: насталі цяжкія часы для ўсіх, хто працаваў з Усходам і краінамі Цэнтральнай Азіі. Ён выказаў занепакоенасць тым, што Польшча адкрывае свае пункты пропуску, а гэта, на яго думку, можа «адрэзаць» краіны Балтыі ад усходняга кірунку ў лагістыцы. Перавозчыкі просяць улады вярнуцца да «здаровага сэнсу» і падтрымліваць эканоміку: яны падкрэсліваюць, што не маюць дачынення да крызісу з метэазондамі і проста хочуць працаваць.
Асацыяцыя Linava ў афіцыйным каментары патлумачыла, што не мае дачынення да гэтага «кава-сходу». Яна разумее эмоцыі перавозчыкаў, але заклікае іх да спакою і асцярожнасці, каб не пагоршыць сітуацыю. На думку кіраўніцтва найбуйнешай арганізацыі літоўскіх перавозчыкаў, рашэнні трэба шукаць праз перамовы і каардынаваныя дзеянні, а не праз стыхійныя акцыі. У Linava кажуць, што разам з дзяржорганамі і дыпслужбамі шукаюць выхад: вяртанне фур з Беларусі, мінімізацыя страт і аднаўленне бяспечнай працы кампаній.
Раней паведамлялася, што Linava адмовілася арганізоўваць пратэст у сувязі з тым, што каля тысячы літоўскіх грузавікоў застаюцца на тэрыторыі Беларусі пасля таго, як улады Літвы на месяц закрылі апошнія два пункты пропуску з-за праблем з паветранай кантрабандай, якая перашкаджала працы віленскага аэрапорта.
Чэргаў на мяжы цяпер не будзе? Чаго чакаць ад адкрыцця «Брузгоў» і «Бераставіцы»
Уладзіслаў Кандратовіч: «Лукашэнка з літоўскімі фурамі абышоўся як рэкецір»
Беларусь пагражае штрафамі кіроўцам, якія не перагналі літоўскія фуры на стаянкі
Наўседа заявіў пра гатоўнасць да перамоў з Беларуссю, але толькі на тэхнічным узроўні
Старшыня асацыяцыі літоўскіх перавозчыкаў назваў Беларусь «тэрарыстычнай дзяржавай»
Каментары
Віціс Юрконіс, павучальнік ты наш, навучы сваіх суайчыньнікаў мацней змагацца!