Міжнародная арганізацыя працы патрабуе ад уладаў Беларусі вярнуць пашпарты вызваленым лідарам прафсаюзаў
Адміністрацыйная рада Міжнароднай арганізацыі працы разгледзела становішча з правамі працоўных у Беларусі і прыняла рашэнне, у якім патрабуе, каб беларускія ўлады вярнулі пашпарты ўсім вызваленым 11 верасня з турмы і дэпартаваным з краіны лідарам і актывістам незалежных прафсаюзаў, піша «Радыё Свабода».
Пра гэта паведаміў у фэйсбуку старшыня Кангрэса незалежных прафсаюзаў Аляксандр Ярашук, які пасля вызвалення быў таксама прымусова вывезены ў Літву. Ён адзначыў, што прадстаўніца Беларусі пры аддзяленні ААН ў Жэневе Ларыса Бельская не чакала такіх вынікаў і настойвала на перагаласаванні, калі іх убачыла.
Ярашук нагадаў, што ў свой час Беларусь атрымала найстражэйшае пакаранне, прадугледжанае статутам МАП — прымяненне параграфа 33, які за ўсю гісторыю арганізацыі выкарыстоўвалі толькі адносна М’янмы і Беларусі. Пры гэтым беларускія ўлады адмовіліся ад дыялогу са спецыяльным пасланнікам МАП і не выканалі патрабаванняў гэтага параграфа. Большасць членаў Адміністрацыйнай рады МАП крытычна ацаніла дзеянні беларускага боку, у той час як прадстаўнік урада Беларусі абвінаваціў МАП у прадузятасці.
Рашэнне, у якім адным з галоўных пунктаў абазначана вяртанне пашпартоў Аляксандру Ярашуку і іншаму прафсаюзнаму лідару Генадзю Фядынічу і аднаўленне ім пенсійных выплат, падтрымалі 40 краін, дзве прагаласавалі супраць, а дзевяць устрымаліся.
Цяпер улады Беларусі павінны паведаміць пра выкананне патрабаванняў на наступным пасяджэнні Адміністрацыйнай рады ў сакавіку 2026 года.
11 верасня ўлады вызвалілі 52 чалавекі пасля сустрэчы Лукашэнкі з амерыканскай дэлегацыяй, але ўсіх іх прымусова вывезлі ў Літву без пашпартоў — толькі з даведкамі, падпісанымі чыноўнікам МУС Аляксеем Бегуном.
Цяпер чытаюць
Бухі Ігар з Віцебска ўжо не ведае, як адбіцца ад падарункаў ад розных брэндаў. І ўжо звальняецца з завода21
Каментары