У Мінску адбыўся суд, аналагічны выпадку з кватэрай Долінай. Як ён скончыўся?

У сакавіку 2025 года суд у Расіі вярнуў кватэру Ларысе Долінай, прызнаўшы, што ў той момант яна не магла кантраляваць сітуацыю. Ёй дазволілі не вяртаць грошы — пакупніцы Паліне Лур’е прапанавалі патрабаваць кампенсацыю страт з махляроў, на рахункі якіх спявачка і адправіла грошы. Некалькі з іх атрымалі ад чатырох да сямі гадоў калоніі.

Пасля гэтага выпадку прадаўцы кватэр сталі часцей заяўляць, што прадалі жыллё «пад уздзеяннем махляроў», і праз суд патрабавалі вярнуць ім нерухомасць. На канец лістапада 2025 года, паводле даных расійскай Федэральнай палаты адвакатаў, у судах суседняй краіны разглядалася не менш за 150 такіх спраў.

«Люстэрка» знайшло аналагічную гісторыю з Мінска ў беларускім банку судовых рашэнняў. Дакумент ананімізаваны — у ім не пазначаныя рэальныя імёны ўдзельнікаў разбіральніцтва. 

3 красавіка 2023 года Вольга заключыла з Ігарам (імёны выдуманыя) дамову куплі-продажу кватэры ў Мінску. Мужчына заплаціў за яе 52 тысячы даляраў паводле курсу Нацбанка на той момант.

Па дакументах Вольга выпісалася з жылплошчы і зарэгістравалася ў вёсцы. Але фактычна працягвала жыць у прададзенай кватэры і не вызваліла яе ў устаноўлены тэрмін. У выніку новы ўласнік звярнуўся ў суд з патрабаваннем выселіць былую гаспадыню.

Падчас пасяджэння Вольга сцвярджала, што стала ахвярай махляроў. Па яе словах, яна прадавала жыллё «пад уздзеяннем падману з боку пазначаных асоб», а насамрэч наогул не збіралася гэтага рабіць. Жанчына падала сустрэчны пазоў з патрабаваннем прызнаць дагавор нікчэмным і прымяніць наступствы несапраўднасці здзелкі — то-бок вярнуць ёй права ўласнасці.

10 ліпеня 2023 года суд Ленінскага раёна Мінска разгледзеў абодва пазовы. Суддзя стаў на бок Ігара — новага ўласніка. Довады Вольгі пра тое, што яе падманулі, не прынялі, а сустрэчны пазоў адхілілі поўнасцю.

У выніку суд пастанавіў выселіць жанчыну з кватэры без прадстаўлення іншага жылога памяшкання. Акрамя таго, з яе спагналі судовыя выдаткі на карысць Ігара: 1000 рублёў за аплату юрыдычнай дапамогі і яшчэ 111 рублёў дзяржаўнай пошліны.

Таксама суразмоўца-адвакат у размове з «Люстэркам» адзначыў: у беларускай практыцы бываюць выпадкі прызнання здзелак куплі-продажу нерухомасці несапраўднымі. Каб гэтага пазбегнуць, існуюць рэкамендацыі юрыстаў і спосабы праверыць контрагента. Напрыклад, можна заказаць псіхолага-псіхіятрычную экспертызу для прадаўца, каб пазбавіцца рызыкі наступных разбіральніцтваў наконт таго, ці ўсведамляў ён свае дзеянні.

— Аднак мне не вядомы ніводны выпадак, калі б здзелку адмянялі толькі на той падставе, што прадавец дзейнічаў пад уздзеяннем тэлефонных махляроў — «пад бесперапынным псіхалагічным уздзеяннем», як указвае расійская спявачка ў апісанай справе, — кажа ён.

Калі суд усё ж прызнае здзелку несапраўднай або нікчэмнай, то далей ужываецца механізм рэстытуцыі — вяртанне да першапачатковага стану.

— Па сутнасці гэта азначае, што кожны з бакоў павінен вярнуць усё атрыманае: пакупнік вяртае прадаўцу нерухомасць, а той — заплачаныя за яе грошы, — тлумачыць адвакат і дадае, што на гэтым этапе бываюць складанасці. — Калі вярнуць кватэру часта не складае вялікай цяжкасці, то грошы могуць знікнуць бясследна, як і ў апісанай сітуацыі. У выпадку ж, калі ў прадаўца па нейкіх прычынах не засталося сродкаў, даводзіцца разлічваць толькі на прымусовае выкананне, якое расцягваецца на доўгія гады, і часта поўны разлік так і не адбываецца ніколі.

• 5
• 0
• 0
• 3
• 1
• 0
• 0
• 0