Да 2015 года ў беларускіх школах плануецца ўвесці факультатыўныя заняткі «Асновы прававых ведаў», вучэбныя праграмы «Азбука права».
Гэта прадугледжана планам мерапрыемстваў па прававой асвеце грамадзян на 2011–2015 гады, які зацверджаны пастановай урада Беларусі № 1771 ад 3 снежня.
Як паведамляецца на афіцыйным сайце Міністэрства юстыцыі, увядзенне новых факультатыўных заняткаў і вучэбных праграм, а таксама правядзенне разнастайных конкурсаў і алімпіяд па профільнай тэматыцы разглядаецца «ў якасці важнага сродку папулярызацыі прававых ведаў у галіне правоў і свабод чалавека».
Як адзначаюць у Мінюсце, мерапрыемствы плана па прававой асвеце скіраваныя «на павышэнне ўзроўню прававой культуры шырокага кола асоб, на фарміраванне ў насельніцтва краіны цікавасці дзейнічаць на працягу свайго жыцця ў якасці актыўных і адказных грамадзян, якія паважаюць правы іншых членаў грамадства». Мерапрыемствы таксама нацэленыя «на навучанне людзей арыентавацца ў сітуацыях, якія патрабуюць прававых ведаў, у мэтах стварэння неабходных умоў для максімальнай абароны імі сваіх правоў і законных інтарэсаў».
Каментары