«Можа, гэтыя дзеячы ад „пятай калоны“ раскрыюць карты і пакажуць, хто заказаў», — заявіў Лукашэнка, заслухоўваючы даклад пра ход расследавання тэракту. Як адрэагавалі апазіцыйныя палітыкі на даручэнне прэзідэнта дапытаць «дзеячаў ад палітыкі» з мэтай знайсці саўдзельнікаў і заказчыкаў выбуху ў метро?
— Мне хочацца плакаць наўзрыд, — прызнаўся лідар Аб’яднанай грамадзянскай партыі Анатоль Лябедзька. — Учора я прачнуўся з дзіўнай думкай: «Калі б ты быў цяпер у „амерыканцы“, у цябе было б стопрацэнтнае алібі». Гэта ж трэба давесці сітуацыю да такога!
На думку Лябедзькі, з апазіцыі хочуць зрабіць «рудога Чубайса, у той час як яна пад асфальтавым катком».
Адзін з лідараў грамадзянскай кампаніі «Гавары праўду!» Аляксандр Фядута, які нядаўна выйшаў з СІЗА КДБ, асцярожны ў ацэнках. Ён адмовіўся каментаваць заяву кіраўніка дзяржавы.
— Я не з’яўляюся лідарам апазіцыі і не адношуся да «пятай калоны». Мяне ніхто не дапытваў, — заявіў Фядута ў гутарцы з карэспандэнтам «Салідарнасці». — Калі спытаюць, я скажу, дзе знаходзіўся ў момант выбуху. Я спадзяюся, што мяне праслухоўвалі і праглядалі. Адчуваю сябе спакойна і ўпэўнена, як і кожны чалавек з чыстым сумленнем. Я лічу, што няма сілы ні ва ўладзе, ні ў апазіцыі, якая была б зацікаўленая ў выбуху ў метро.
Фядута выказаў здагадку, што думка аб датычнасці дзеячаў апазіцыі да тэракту Лукашэнку маглі падкінуць.
Аляксандр Мілінкевіч упэўнены, што ў беларускай апазіцыі няма такіх радыкальных персанажаў і групаў, якія маглі б «замовіць» тэракт.
— Я ў апазіцыі з часоў перабудовы, і ведаю, што сярод дэмакратычнай супольнасці няма людзей, якія арганізавалі б ці распрацавалі сцэнар выбуху ў метро, — адзначыў Мілінкевіч.
Цяпер чытаюць
Бульба-фітнэс: беларусы паказваюць у сацыяльных сетках, колькі бульбы выкапалі сёлета7
Каментары