Як карэспандэнт НН спрабаваў сфатаграфаваць новы курс валют.
11 мая Нацбанк дазволіў свабодны курс наяўнай валюты. Журналіст НН атрымаў заданне наведаць шэраг мінскіх банкаў і абменнікаў і зрабіць здымкі.
Абменны пункт «Белзнешэканомбанка», што каля ЦУМа, зачыніўся на тэхнічны перапынак перад самым носам. «Пайшлі цэннікі перабіваць», — жартуюць маладыя людзі ў чарзе, якая не адыходзіць ад абменніка, хоць той і не працуе.
Людзі па-ранейшаму дзяжураць каля абменнікаў. Навіну пра дэвальвацыю тут, здаецца, даўно чакалі. «Як думаеце, з’явяцца цяпер даляры?», — пытае бабуля загарэлага дзецюка, які абмахваецца газецінай. — «Хто яго ведае. Няхай бы ўжо з‘явіліся».
Факт дэвальвацыі, як падаецца, людзі ўспрынялі як дадзенасць. Галоўнае пытанне цяпер — калі з’явіцца валюта ў вольным продажы. Стаянне ў чэргах абрыдла.
Знайсці банк, які працуе па новым курсе, усё не ўдаецца. Заходжу, з парогу гляджу на табло і сыходжу. І я такі не адзін: на парозе чарговага абменніка натыкаюся на двух мужчынаў, якія сыходзяць, кінуўшы беглы позірк на «старыя» лічбы.
У адным з банкаў даводзіцца абараняцца, а заадно рэкламаваць сваё выданне.
«І чаму вы, беларускія журналісты, нічога не пішаце пра тое, што робіцца ў краіне?» — пытае мяне супрацоўніца. Адказваю, што мы пішам пра ўсё. «Пішаце? І дзе пра гэта можна пачытаць?».
І, нарэшце, удача — адно з аддзяленняў «Белпрамбудбанка» на праспекце Незалежнасці парадавала новым курсам. Пытаю дазволу ў супрацоўнікаў зрабіць колькі кадраў. Мяне накіроўваюць да загадчыцы аддзялення. Тая не наважваецца на самастойнае рашэнне і тэлефануе вышэй. «Нельга? Добра, перадам», — кажа яна ў слухаўку і звяртаецца да мяне. — «Нельга. Раздрукуйце, калі ласка, новы курс на нашым сайце».
Цяпер чытаюць
У дажджавіках і па калена ў гразі. Чыноўнікаў у дождж пагналі на суботнік, сам Лукашэнка не пайшоў31
У дажджавіках і па калена ў гразі. Чыноўнікаў у дождж пагналі на суботнік, сам Лукашэнка не пайшоў
Ездзілі шукаць нават у БССР, а неапазнанае цела 30 гадоў ляжала ў спецсховішчы. Новыя дэталі загадкавага знікнення ў ЗША беларускага пісьменніка Міколы Цэлеша22
Каментары