«
У інтэрв'ю радыёстанцыі «Русская служба новостей» (РСН) Аляксандр Лукашэнка прыгадаў падзеі гадавой даўніны.
Паводле яго слоў, вулічныя беспарадкі 19 снежня не былі справакаваныя ні Захадам, ні Расіяй.
«Не расіяне і не Захад тут тварылі справы. Гэта пэўныя дзеячы. Двое з іх цяпер застаюцца пакуль у турме. Яны хочуць быць героямі — ну і няхай, нічога страшнага», — сказаў Лукашэнка, маючы на ўвазе сваіх канкурэнтаў на прэзідэнцкіх выбарах Андрэя Саннікава і Мікалая Статкевіча.
Беларускі кіраўнік не згодныя з тым, што гэтыя палітыкі, знаходзячыся ў турме, перашкаджаюць яму больш, чым на волі (такое меркаванне выказаў кіраўнік РСН Сяргей Дарэнка).
«Яны мне абсалютна ніяк — ні плюс, ні мінус. Яны думаюць, што яны будуць такім чынам героямі? Добра. Хочаце героямі быць — даю вам такую магчымасць, будзьце. Я не лічу, што яны такім чынам героямі будуць, абсалютна», — падкрэсліў Лукашэнка.
Ён у чарговы раз заявіў, што асабіста кіраваў дзеяннямі сілавікоў падчас падзей у Мінску 19 снежня: «19-га я аддаваў наўпрост каманды, як дзейнічаць. Гэта былі мае каманды, гэта не сілавікі».
Паводле слоў Лукашэнкі, ён называе беларускую апазіцыю пятай калонай, таму што «апазіцыя — гэта штосьці грунтоўнае». «Я сам з апазіцыі прыйшоў да ўлады», — нагадаў ён.
«Вось гэта пятая калона — гэта 400 чалавек.
У мяне спісы ляжаць на стале, нашы спецслужбы ведаюць кожнага.Калі праплаціць і гэтак далей, яны могуць сабраць 800, усё астатняе — гэта разявакі», — лічыць кіраўнік дзяржавы.
«Вось гэтая пятая калона», паводле меркавання Лукашэнкі, і «падбухторыла людзей» на «сацыяльную рэвалюцыю» — «рабяты пачалі пляскаць».
Лукашэнка лічыць небяспечным захапленне цяперашняй моладзі — як у Беларусі, так і ў Расіі — вулічнымі пратэстамі.
«Гэта небяспечна. З гэтага трэба знаходзіць выхад цяпер, таму што гэтыя трэндавыя і модныя рэчы абавязкова перарастуць у штосьці большае, калі не знайсці магчымасці адрэагаваць», — сказаў ён.
«Нельга ствараць прычын для таго, каб гэта было модным. Мы не павінны гэта ствараць», — падкрэсліў Лукашэнка.
Цяпер чытаюць
«Набірала ваду з унітазнага бачка для гатавання, мыцця». Ганна Бонд шчыра распавяла пра цяжкае дзяцінства6
Каментары