І выкладаюць відэа размовы з імі ў інтэрнэт.
«Паляўнічыя» на педафілаў ствараюць на сайце знаёмстваў анкету дзяўчынкі/хлопчыка 12-14 гадоў.І чакаюць прапановаў сустрэцца для сэксу, пры гэтым акцэнтуючы ўзрост.
Калі перапіска з непрыстойнымі прапановамі працягваецца, то дамаўляюцца на сустрэчу.Аднак замест чаканай «лаліты» няўдалых педафілаў чакаюць дужыя хлопцы.
«Мы прыходзім, каб расчараваць педафіла і крыху з ім пагутарыць», — заяўляюць стваральнікі суполкі «Стоп Выблюдкі».Пры гэтым падкрэсліваюць, што ў дачыненні да патэнцыйнага педафіла гвалт не ўжываецца. «Мы адно здымаем сустрэчы на відэа, патрабуючы прызнанняў і прабачэнняў».
На дадзены момант у суполцы ёсць 3 відэазапісы такіх размоваў.На ўсіх – мужчыны 35-40 гадоў. Аднаго «няўдалага» педафіла ўжо распазналі, указалі яго імя і прозвішча. Яшчэ адзін аказаўся былым «афганцам» (паказаў сваё пасведчанне). Дарэчы, «афганец» выбачыўся і нават «падзякаваў, што мазгі ўправілі», расказвае мадэратар суполкі.
Вось што апавёў «Нашай Ніве» аўтар ідэі, зарэгістраваны пад нікам «Стоп Выблюдкі» (сапраўднае імя ён не паведаміў, бо не хоча славы і баіцца праблем з міліцыяй).
«Я доўгі час сачыў за працай нашых, калі так можна сказаць, калег з Расіі. Аднойчы іх відэа размясцілі на адным з беларускіх сайтаў.
Тады я пакінуў каментар са словамі «Можа і ў нас стварыць нешта падобнае?». Аднак ніхто мяне не падтрымаў, а нехта нават адказаў «Ды ў нас іх няма, яны ўсяго баяцца».
Мінуў месяц. У калегаў з Расіі выйшла новае відэа.
Пасля прагляду я вырашыў усё ж паспрабаваць стварыць анкету дзяўчынкі 14 гадоў.Дадаў пару фотак.
Праз нейкі час мне напісалі каля 20-ці чалавек! Траціна з іх у адкрытую казалі, што хочуць сэксу.
Пасля словаў «мне ўсяго 14 гадоў» нехта папрасіў прабачэння і перастаў пісаць. А нехта працягваў, кажучы «Ну і што? Мяне гэта зусім не засмучае!».Вось такіх людзей мы і ловім».
Па словах аўтара ідэі, адзін з «педафілаў» прасіў выдаліць відэа, але яму адмовілі. «На жаль ці на шчасце, я ўсё менш шкадую такіх людзей. Аднак усё, што мы робім, застаецца ў кадры.
Мы не выкарыстоўваем сілу. Мы робім гэта проста, каб быць хоць чымсьці карыснымі для грамадства».
Суполка «Стоп Выблюдкі» была створана 21 сакавіка 2012 года. Цяпер у ёй больш за 1000 удзельнікаў. Нядаўна з’явілася і рэгіянальная «філія» ў Віцебску.
Мы паразмаўлялі з адным з удзельнікаў суполкі «Стоп Выблюдкі» Аляксеем Лысым.
Наша Ніва: Аляксею, чаму вырашыў далучыцца?
Аляксей Лысы: Ніколі не трываў вычварэнцаў. Няхай гэта будуць «геі», «педафілы» ці нехта яшчэ. Бо калі праблему запусціць, вынікі будуць нашмат горшымі. А ў дадзеным выпадку некаторым «мазгі» на месца становяцца. Страхатэрапія, ці што.
НН: Геі, па-твойму, таксама вычварэнцы?
АЛ: Калі вы хочаце ведаць маё асабістае меракаванне, то так. Але гэта ніяк не тычыцца нашага праекта.
Зрэшты, на аўтараў ідэі абрынулася нямала крытыкі. Маўляў, гэта самасуд.А яшчэ – правакацыя, бо 12-14 гадовых на сайтах «знаёмстваў» увогуле не павінна быць.
Аўтары, у сваю чаргу, заяўляюць, што яны не праяўляюць ініцыятыву, а наадварот, чакаюць прапановы ад карыстальнікаў сайтаў знаёмстваў. А паколькі фізічная сіла ў дачыненні да тых, хто прыйшоў на сустрэчу, не выкарыстоўваецца, наўрад ці можна назваць гэта самасудам.
Іншая рэч, калі чалавек просіць выдаліць уласнае фота ці відэа з сайта. Калі гэта не зроблена, ён мае права падаць на сайт у суд. Аднак наўрад ці тыя, хто «трапіў», захочуць агалошвання.
Як паведаміў Tut.by Алег Слепчанка, намеснік начальніка ўпраўлення па раскрыцці злачынстваў у сферы высокіх тэхналогій, гэтая акцыя не з’яўляецца ініцыятывай МУС. Хутчэй за ўсё, ініцыятарамі сталі неабыякавыя карыстальнікі інтэрнэту.
Асобна знятае відэа ці паказаная ў роліку перапіска яшчэ не доказ віны.
«Дадзеная група «Укантакце» не сказаць што дзейнічае не ў рамках закона, але на мяжы», — кажа Слепчанка.Галоўнае, каб гэтыя маладзёны не ўчынілі «суд Лінча», засцерагае ён.
Што будзе далей з «педафіламі», — вырашыць народ, кажа Аляксей Лысы.У рэальнасці, кажа ён, гэтыя людзі нагадваюць забітых няўдачнікаў, якія часцей за ўсё ў інтэрнэце выкладаюць не сваё фота.
Цяпер чытаюць
«Вайна ўсё спіша». Беларускім удзельнікам гей-прайда ў Вільні пагражалі расправай ад імя беларускіх ваяроў за выкарыстанне бела-чырвона-белага сцяга45
Каментары