Супрацоўнікі ў цывільным спрабавалі завербаваць актывіста кампаніі «Ежа замест бомбаў».
Да актывіста кампаніі «Ежа замест бомбаў», затрыманага падчас акцыі па раздачы ежы каля станцыі метро «Усход» у Менску 15 студзеня, супрацоўнікі КДБ прыйшлі па месцы вучобы (Беларускі нацыянальны тэхнічны універсітэт – БНТУ) і прапаноўвалі супрацоўніцтва. Імя актывіста мы не падаем у інтарэсах ягонай бяспекі.
Размова з супрацоўнікамі КДБ адбывалася ў дэканаце ўніверсітэта 13 лютага. Папярэдне намеснік дэкана факультэту БНТУ, на пятым курсе якога навучаецца актывіст, патэлефанаваў яму і папрасіў прыйсці ў дэканат, каб напісаць тлумачальную з той нагоды, што яго затрымлівала міліцыя. Намеснік дэкана сказаў студэнту, што гэта – «простая фармальнасць».
Калі актывіст прыйшоў у дэканат, там былі 2 невядомыя чалавекі ў цывільным. Намеснік дэкана пакінуў студэнта разам з імі пісаць тлумачальную. Асобы ў цывільным пачалі задаваць хлопцу пытанні, датычныя ягонай грамадзянскай актыўнасці. Прадставіцца яны адмовіліся, толькі далі зразумець, што працуюць у Камітэце дзяржаўнай бяспекі.
Падчас размовы 5-курсніку БНТУ пагражалі праблемамі з войскам ды размеркаваннем.
Адмовіўшыся гутарыць з невядомымі асобамі, малады чалавек накіраваўся да дзвярэй кабінету, але яны апынуліся зачыненыя. Пасля шэрагу пытанняў, на якія актывіст адмовіўся даваць адказы, дзверы звонку адчыніў намеснік дэкана і адпусціў яго.
Паўторна цікавасьць да актывіста ўзнікла пасля затрымання падчас канцэрту «Ежа замест бомбаў» 24 сакавіка ў клубе «Ё-маё»,што знаходзіцца ў будынку Палацу культуры МТЗ. Цягам наступнага тыдня, з 26 па 31 сакавіка, супрацоўнікі КДБ спрабавалі паўплываць на актывіста праз бацьку,
але той заявіў, што сын не будзе супрацоўнічаць нават пад пагрозай выключэння з універсітэта.
29 сакавіка студэнт напісаў тлумачальную з нагоды новага затрымання. Крыху пазней намеснік дэкана запатрабаваў у актывіста напісаць паперу аб тым, што ён «не будзе ўдзельнічаць у палітыцы і грамадскай дзейнасці». Аднак пазней заявіў, што неабходнасць у напісанні такой паперы зніклі.
Каментары