У сераду вечарам Беларусь пакінуў пратэстанцкі сьвятар Яраслаў Лукасік. Разьвітацца з пастарам на менскі чыгуначны вакзал прыйшло каля васьмідзесяці чалавек.
У сераду вечарам Беларусь пакінуў пратэстанцкі сьвятар Яраслаў Лукасік. 30 траўня сёлета начальнік Цэнтральнага РУУСу Менску Сінякоў аштрафаваў Лукасіка за набажэнства, якое праводзілася ў прыватным доме, а таксама абвясьціў пра дэпартацыю і забарону на ўезд у Беларусь цягам пяці гадоў. Зьехаць зь Беларусі Лукасік мусіў да 7 чэрвеня.
Разьвітацца з пастарам царквы "Ян Прадвесьнік" на менскі чыгуначны вакзал прыйшло каля васьмідзесяці чалавек. Сярод іх былі пяцідзесятніцкі біскуп Сяргей Хоміч, пастар Антось Бокун, які ў гэты самы дзень толькі выйшаў з Акрэсьціна пасьля трох сутак арышту, адзін з стваральнікаў Беларускай хрысьціянскай дэмакратыі Аляксей Шэін, “маладафронтаўцы” Барыс Гарэцкі і Зьміцер Хведарук, шматлікія парафіяне царквы.
Жонка Яраслава Лукасіка Натальля трымала ў руках маленькі букецік валошак. Каля бацькоў увесь час круціліся трое іхных дзяцей. Калі суд не задаволіць скаргу Натальлі Лукасік, то яна разам зь дзецьмі таксама зьедзе ў Польшчу.
На пэроне Яраслаў Лукасік зрабіў невялікую прамову, ён сказаў: "Я вельмі задаволены тымі чатырнаццаці гадамі, якія я правёў у Беларусі. Я ўпэўнены, што мы з вамі ўбачымся на гэтай зямлі значна раней, чым празь пяць гадоў. Сьвет невялікі, таму, спадзяюся, мы зможам бачыцца ў іншых кутках сьвету". Пасьля гэтай прамовы Яраслаў Лукасік прапанаваў памаліцца. Сярод іншага ён маліўся за тое, каб “Бог зьмяніў гэтую зямлю”. Малітва скончылася працяглымі авацыямі.
Перад тым, як сесьці ў цягнік, Яраслаў Лукасік пасьпеў яшчэ раз абняцца са сваімі роднымі і блізкімі. Заплакалі ягоныя дзеці. Лукасік паабяцаў у хуткім часе сустрэцца з усімі зноў ў Беларусі.
Мацкевіч: Не пара аспрэчваць лідарства Ціханоўскай. Яна вельмі добрая ў якасці лідаркі6
Мацкевіч: Не пара аспрэчваць лідарства Ціханоўскай. Яна вельмі добрая ў якасці лідаркі
Ездзілі шукаць нават у БССР, а неапазнанае цела 30 гадоў ляжала ў спецсховішчы. Новыя дэталі загадкавага знікнення ў ЗША беларускага пісьменніка Міколы Цэлеша22
Каментары