пераабмундзіраваньне
Наша войска ў камізэльках
Сёлета шэраг падразьдзяленьняў беларускага войска атрымаў новую форму. Чыноўнікі зь Мінабароны кажуць, што праз тры гады яе апрануць усе вайскоўцы.
Міністар абароны генэрал-палкоўнік Леанід Мальцаў плянуе скончыць рэфармаваньне беларускага войска ў 2005 г. Да таго часу Ўзброеныя Сілы краіны скароцяцца з 80 тыс. вайскоўцаў і 20 тыс. цывільных службоўцаў да 50 і 15 тыс. адпаведна. Адным зь першых крокаў рэформы сталася распрацоўка абмундзіраваньня новага ўзору.
Яно будзе розьніцца ад старога іншым малюнкам камуфляжу, разьмешчаным упоперак (раней ён разьмяшчаўся ўздоўж). У рэчавай службе тылу Ўзброеных Сілаў, якая займалася распрацоўкай абмундзіраваньня, кажуць, што яно зробленае з больш якаснай тканіны — ня будзе гэтак выгараць і выцягвацца.
Апроч таго, у кожнага вайскоўца будзе “разгрузачная камізэлька”, кшталту тых, якія маюць дэсантнікі. У яе кішэні можна будзе класьці мэдыкамэнты, магазыны з патронамі, гранаты, харчы, радыёстанцыю — усё, што раней месьцілася ў сумках. Камізэлькі для аўтаматчыкаў, снайпэраў і кулямётчыкаў будуць розьніцца. Па дэсантным варыянце зроблены і рэчавы мех, у якім, сярод іншага, мусіць быць спартовы касьцюм, зьмена абутку і г.д. Афіцэры атрымаюць індывідуальныя радыёстанцыі ды каліматорныя лазэрныя прыцэлы.
Першымі форму новага ўзору атрымалі жаўнеры і афіцэры найбольш баяздольных часьцей. Так, сёлета ўвесну яе апранула 1-я мотастралковая рота 11-й гвардзейскай асобнай мэханізаванай брыгады, што стаіць у Слоніме. Леанід Мальцаў у красавіку асабіста агледзеў гэтую роту і быў задаволены выглядам байцоў у новым абмундзіраваньні. А ў часе сумесных расейска-беларускіх вучэньняў на Гарахавецкім палігоне пад Масквой слонімская рота ўразіла расейцаў сваёй амаль “NATOўскай” формай.
Алег Тачоны
Каментары