***
НА 1% — да 39% гадавых Нацбанк зьменшыць стаўку рэфінансаваньня і ўліковую стаўку з 21 кастрычніка.
На 16,7% павялічыўся за восем месяцаў экспарт тавараў зь Беларусі ў краіны, якія не належаць да СНД. Экспарт у краіны СНД паменшаў на 6,8%, у тым ліку ў Расею — на 2,1%.
Кожны пяты з 2 млн. 477 тыс. пэнсіянэраў афіцыйна працягвае працаваць. Краіна старэе: цяпер на 100 пэнсіянэраў прыпадае 165 працаздольных. Сярэдні памер пэнсіі складае 80,4 тыс. рублёў.
3 з 11 участкаў пад пабудову супэрмаркетаў у Менску разьмеркаваныя паміж ТАА “Гандальоптыма” (2 участкі), што мае ўжо міні-рынак у Малінаўцы, ды ангельска-беларускім прадпрыемствам “БелВілесдэн” (1 участак). Хто атрымае астатнія — будзе вядома да пачатку 2003 г.
100 тонаў — такі аб’ём будзе мець новая печ-коўш, якую сёлета паставяць на Беларускім мэталюргічным заводзе. Яна дапаможа павялічыць вытворчасьць на 18% ды ашчадзіць электрычнасьць на 5%. Праект ды тэхналёгія печы распрацаваныя аўстрыйскай кампаніяй “Фэст-Альпінэ”.
НА 4 МЛН. ДАЛЯРАЎ хоча купіць камбайнаў у “Гомсельмашу” ўрад Аргентыны.
60,5 МЛН. ДАЛЯРАЎ склала запазычанасьць па заробках у пачатку кастрычніка — гэта 20% ад усіх налічаных за месяц грошай. Найбольш завінаваціліся сваім працаўнікам калгасы і саўгасы (47,2 млн.). Некаторыя зь іх яшчэ не сплацілі грошай за люты.
Каментары