Schiema baraćby

Treba prapanavać eŭrapiejcam realistyčnuju schemu dziejnaści — z ulikam ich kompleksaŭ i abmiežavańniaŭ.

Eŭrakamisija abviaściła tender, u vyniku jakoha novaje viaščańnie na Biełaruś moža raspačać adzin z eŭrapiejskich radyjohihantaŭ (moža, znoŭ «Niamieckaja chvala»?), pryčym vielmi mahčyma, što na rasiejskaj movie. Vice-śpikier Eŭraparlamentu Januš Anyškievič z taho aburajecca i namahajecca źmianić umovy tenderu.

Sprava, kaniečnie, dobraja, dziakuj jamu, ale šancaŭ mała. Lepiej dumać, što rabić u hetych umovach, i pačynać heta rabić jak maha chutčej.

Chvala emacyjnych zvarotaŭ aburanych hramadzian tut dapamoža mała. Z eŭrapiejcami treba inakš — treba być racyjanalnymi, prahmatyčnymi, realistyčnymi.

Treba davieści da kiraŭnictva i ekspertaŭ Eŭrakamisii, da kožnaj z bujnych radyjostancyj arhumenty na karyść taho, što vykarystańnie biełaruskaj movy nia budzie marnavańniem hrošaj.

Arhumentaŭ nie brakuje, i najlepšym daradcam u ich zbory budzie, peŭna, TBM. Tut možna zhadać i tyražy biełaruskamoŭnych hazet u najlepšyja ich časy, paraŭnaŭšy z najlepšymi tyražami ich ciapierašnich rasiejskamoŭnych analahaŭ; i pierachod mnohich suśvietnych kampanij na reklamavańnie pradukcyi pa-biełarusku.

Potym nadydzie čarha i arhumentaŭ na karyść užyvańnia biełaruskaj movy jak faktaru demakratyzacyi Biełarusi, uzmacnieńnia jaje eŭrapiejskaści.

Narešcie, treba prapanavać eŭrapiejcam realistyčnuju schiemu dziejnaści — z ulikam ich kompleksaŭ i abmiežavańniaŭ. Naprykład, prapanavać u jakaści kampramisu arhanizavać viaščańnie spačatku na dźviuch movach na parytetnaj asnovie z deklaravańniem pierachodu ŭ najbližejšy čas tolki (ci pieravažna) na biełaruskuju movu. Prapanavać radyjostancyjam persanalii biełaruskamoŭnych radyjščykaŭ, realnuju dapamohu ŭ razhortvańni viaščańnia, karespandenckaj sietki, reklamy.

I apošniaje — najlepšym čynam danieści hetyja arhumenty da kiraŭnictva Eŭrakamisii i radyjostancyj. Tut spačatku treba padabrać aŭtarytetnych, viadomych u Eŭropie aŭtaraŭ zvarotu (Šuškievič, naprykład, budzie ŭ hetym śpisie darečy). Potym skarystacca dapamohaj taho ž Anyškieviča, kab davieści našy arhumenty da adrasataŭ, pryciahnuć da ich uvahu, a nie zasłać u biurakratyčnuju biezdań.

A dalej — pierakonvać, dachodzić da hramadzkaści i nacyjanalnych uradaŭ krain Eŭraźviazu, da žurnalisckich i vakołradyjnych NDA. I pracavać na bazie realnych, prahmatyčnych, pierakanaŭčych arhumentaŭ i faktaŭ, a nia jenkaŭ-zaklinańniaŭ pra toje, jak «ruka Berlina» myje «ruku Maskvy».

• 0
• 0
• 0
• 0
• 0
• 0
• 0
• 0