Łukašenka ŭ AAN

Kali druhoha polusu niama, jaho treba stvaryć.

Adzin polus dobra, paŭtara lepš. Vystup «našaha» na samicie AAN narabiŭ šuchieru. Tyradu «Spadziajusia, heta zrazumiejuć i mocnyja hetaha śvietu» šmat chto ŭspryniaŭ jak remejk frazy «My vas pachavajem» i čačotki, jakuju Chruščoŭ «zbacaŭ» źniatym z nahi krasoŭkam na trybunie AAN.

Mianie ŭ «Adkrytym pohladzie na sučasny śviet» (tak «Saŭbiełka» nazvała vystup svajho pracadaŭca) zacikaviŭ frahment pra pieravahu dvuchpalarnaha śvietu nad adnapalarnym. Pa lohicy Miensku, kab viarnuć suśvietnuju stabilnaść, treba adradzić na planecie druhi hieapalityčny polus. Raniej tut chałturyła Maskva. Adnak savok, a za im i ŭvieś druhi polus skapycilisia. Kali hetaje adnapalarnaje biaźmiežža tak i pakinuć, čałaviectva čakajuć žudasnyja vyniki: usich dziaciej i žančyn zahoniać u rabstva, a astatnich dastanuć terarysty.

Było b vielmi prykolna, kali b AAN pahadziłasia ź biełaruskim lideram, pryznała nieabchodnaść alternatyŭnaha ZŠA polusu i vyniesła na razhlad sesii adpaviedny prajekt: «U metach dasiahnieńnia suśvietnaj harmonii stvaryć alternatyŭny ZŠA hieapalityčny polus u vyhladzie krainy Ch, vydać joj atamnuju bombu i inšyja pryčyndały hieapalityčnaha polusu. Pałovie krain śvietu stać satelitami krainy Ch u farmacie bloku, jaki možna nazvać «Blok druhich palarnikaŭ». Chto «za»? Adnahałosna.

Zastajecca čysta techničnaje pytańnie: znajści hety samy druhi polus. Ale jak i pa jakich kryterach? Prysvajeńnie, naprykład, Kitaju hanarovaha tytułu «druhi polus» było b niespraviadlivym u dačynieńni da Indyi i naadvarot. Pa spraviadlivaści było b abviaścić siarod krain hlabalny konkurs na tytuł «krainy — druhoha polusu». Heta było b super-šoŭ!

Adnak bajusia, što karumpavanaść AAN znoŭ daść ab sabie znać. Kofi Anan nie ŭtrymajecca, voźmie na łapu i ŭ finalnym pule pastavić za vykanańnie nacyjanalnych tancaŭ Pucinu 2,1 bała, a niejkamu Mbeku z bahataj na ałmazy PAR — 9,9.

Tamu hieapalityčnym Amundsenam treba iści inšym rumbam, kirujučysia zdarovymi lahičnymi sylahizmami. Vidavočna, što polus, alternatyŭny ZŠA, pavinien lažać pa toj bok amerykanskich kaštoŭnaściaŭ, ekanamičnaha ładu i palityčnych normaŭ. Sapraŭdy, nie pryznačać ža na rolu druhoha polusu Kanadu, chaj sabie taja pa vajskovym patencyjale, moža, amal i nie sastupaje ZŠA. Karyści ad takoha «polusu», jak ad sajuzu Biełarusi i Rasiei. Treba tatalny antypod ZŠA. Znajści jaho niaciažka: pahladzieć, jakaja kraina ŭ indeksie čałaviečaha raźvićcia zajmaje toje samaje miesca, što i ZŠA, adnak z advarotnaha kanca śpisu. Hladzim — Handuras.

Voś vakoł kaho musiać jadnacca ŭsie prahresiŭnyja homa sapijensy. Tehusyhalpa (stalica Handurasu) — treci polus, a čaćviortamu nie byvać!

• 0
• 0
• 0
• 0
• 0
• 0
• 0
• 0