Milinkievič nia siadzie na biełaha kania

15 kastryčnika źbiraŭsia Sojm Partyi BNF. Partyjcy zasłuchali Alaksandra Milinkieviča, papiaredzili Alesia Michaleviča dy sklikali na 17—18 śniežnia čarhovy źjezd PBNF.

Udzieł u prabiehu Sojmu braŭ lider Abjadnanych demakratyčnych siłaŭ Aleś Milinkievič. U svaim vystupie jon nahadaŭ, što na Kanhresie pieramoh nia jon asabista, «a nacyjanalnaja ideja — stryžań našaje pracy. Ale my pieramahli nia dziela taho, kab sieści na biełaha kania j adjechać ad inšych, a kab umacavać końnicu». A.Milinkievič akreśliŭ sposab arhanizacyi svaich štaboŭ. Na pieršym etapie, kali hałoŭnaja praca — raspaŭsiud infarmacyi, za asnovu treba brać kustavy pryncyp, ad pačatku 2006 h. — budavać štaby ŭ adpaviednaści z administracyjnym padziełam. Adziny kandydat nie źbirajecca hastralavać pa zahranicach, choć zaprašeńniaŭ bieźlič. Na Sojmie adznačali j vialikuju cikavaść da persony adzinaha: padčas jaho on-łajn-interviju na «Svabodzie» pryjšło 226 pytańniaŭ (dahetul rekord byŭ 70).

Vincuk Viačorka paabiacaŭ, što Partyja BNF stanie lakamatyvam supolnaje pracy: «Chalavy nia budzie, pracavać pryjdziecca nam, mienavita my niasiom adkaznaść za zachavańnie kaalicyi j pieramohu adzinaha kandydata na vybarach. Usie, chto dobra prajaviŭ siabie padčas padrychtoŭki Kanhresu demsiłaŭ, aktyŭna ŭklučacca ŭ pracu štabu kampanii Alaksandra Milinkieviča».

Było padpisana i pahadnieńnie ab supracoŭnictvie z moładzievaj inicyjatyvaj «Pravy aljans» dy zasłuchany spravazdačy kiraŭnikoŭ partyjnych kamisij. Było taksama vyrašana stvaryć arhkamitet novaj unutrypartyjnaj arhanizacyi «Moładź BNF». Cikava, što dva hady tamu, paśla sychodu z partyi Paŭła Sieviarynca, u partyi vialisia razmovy pra toje, što bolš moładzievaja arhanizacyja ŭ składzie BNF stvaracca nia budzie.

Śniežański źjezd Partyi BNF budzie niešmatludny — 155 delehataŭ. Kolkaść siabroŭ Sojmu, jakuju prapanoŭvajecca zaćvierdzić źjezdam, budzie nia bolš za 47 čałaviek (u apošnija hady kolkaść siabroŭ skaračajecca). Kolkaść namieśnikaŭ taksama prapanujecca źmienšyć — da troch. U jakaści «čaćviortaha lišniaha» razhladajecca Aleś Michalevič, jakoha inšyja partyjnyja kiraŭniki na Sojmie vinavacili ŭ kuluarnaj rabocie ŭ Biełarusi i za jaje miežami, skiravanaj na padzieł partyi. Sam Aleś Michalevič adreahavaŭ na krytyku: «Ja suprać padziełaŭ, ale nie chavaju, što na nastupnym źjeździe partyi, jaki projdzie praz dva hady, budu balatavacca na pasadu staršyni. Ja liču pazytyŭnym skaračeńnie adnoj z pasadaŭ namieśnika staršyni, zhodny, što namieśnikaŭ pavinna być mienš. Ale ŭ nas demakratyčnaja partyja, i tolki źjezd vyrašyć, chto budzie namieśnikam, a chto — nie».

• 0
• 0
• 0
• 0
• 0
• 0
• 0
• 0