Dzień biełaruskaj salidarnaści ŭ znak pamiaci ab achviarach palityčnych represij prajšoŭ 16 kastryčnika. Ale śviečki ŭ voknach zapalili niašmat ludziej. Akcyi nacyjanalnaj salidarnaści vymahajuć skansalidavanaści nacyi.
Na Skrabutana cisnuć
Studenta III kursu biełaruskaj filalohii Haradzienskaha ŭniversytetu Jaŭhiena Skrabutana 12 kastryčnika vyklikali na razmovu da prarektarki Taciany Badziukovaj. Pry razmovie prysutničali dekan fakultetu Vital Carlukievič i čałaviek u cyvilnym. Studenta źvinavacili, što numar jahonaha telefona paznačany na maładafrontaŭskich ulotkach, raspaŭsiudžanych va ŭniversytecie, dy pahražali vyklučeńniem.
Vyhnali prafsajuz
Haspadarčy sud Miensku 10 kastryčnika zadavoliŭ pazoŭ ŽREA Partyzanskaha rajonu i pazbaviŭ Svabodny prafsajuz Biełaruski pamiaškańnia. Farmalnaja pryčyna — «praterminoŭka z vypłataju arendy».
Papiaredžańni za palakaŭ
11 kastryčnika Mienskaja haradzkaja prakuratura vyniesła papiaredžańni pradstaŭniku cyhanskaj mienšyni Mikołu Kalininu j aktyvistu pravasłaŭnaj moładzi Andreju Pietravych za dziejnaść ad imia niezarehistravanych arhanizacyjaŭ. Padstavaj staŭ list u abaronu Sajuzu palakaŭ i Anžaliki Borys na imia A.Łukašenki. Padpisantaŭ lista vyklikajuć u prakuraturu. Papiaredžańnie atrymaŭ vykanaŭčy sakratar mižkanfesijna-nacyjanalnaj niezarehistravanaj inicyjatyvy «Zhoda» Alaksandar Ziałko.
Labiedźku apraŭdali
Sud Bieraściejskaha rajonu 11 kastryčnika pryznaŭ lidera AHP Anatola Labiedźku nievinavatym u administracyjnym parušeńni: jamu zakidali arhanizacyju niesankcyjavanaha schodu ŭ Damačavie ŭ lipieni, kudy palityk nie dajechaŭ, bo jaho zatrymali milicyjanty.
Haradzienskija spravy
Kalehija Haradzienskaha abłasnoha sudu 12 kastryčnika pakinuła biaź źmienaŭ časovaje abmiežavańnie prava na vyjezd za miažu Andreju Pačobutu. Žurnalistu prysudzili ŭ lipieni štraf za ŭdzieł u niesankcyjavanym pikiecie ŭ pamiery 5,1 młn rub. Choć Pačobutu zastałosia vypłacić mienš za 500 tys., sudovaja kalehija vyrašyła skasavać zabaronu tolki paśla poŭnaj vypłaty štrafu.
Kiraŭnika haradzienskaj supołki BAŽ Paŭła Mažejku 12 kastryčnika vyklikali ŭ Ščučynski RUUS dla dopytu ŭ jakaści śviedki, ale nie paviedamili — u jakoj spravie. Mažejka jechać admoviŭsia.
Prafsajuzny aktyvist i žurnalist Ivan Roman 12 kastryčnika atrymaŭ adkaz z Ščučynskaj rajonnaj prakuratury, kudy skardziŭsia na ŭmovy ŭtrymańnia ŭ tamtejšym izalatary: jaho mocna pakusali skočki. U adkazie havorycca, što medekspertyza praz dva tydni nie pryznała Romana pakusanym, choć u jaho j była adpaviednaja daviedka z skurvendyspanseru.
Zatrymańni ŭ Viciebsku
13 kastryčnika ŭ sudzie Čyhunačnaha rajonu razhladałasia sprava Barysa Chamajdy: jaho abvinavacili ŭ tym, što jon handluje hazetami i časopisami ŭ nienaležnym miescy, ale śviedkaŭ nie znajšli.
13 kastryčnika zatrymali aktyvistaŭ KCHP-BNF Uładzimiera Pleščanku i Alaksandra Sałaŭjana. Milicyjanty cikavilisia datyčnaściu apazycyjaneraŭ da vybuchaŭ 22 vieraśnia.
Sasimu admovili
Milicyja Centralnaha rajonu Miensku 12 kastryčnika admoviła aktyvistu «Zubra» Mikitu Sasimu ŭ zaviadzieńni kryminalnaj spravy ŭ dačynieńni da amonaŭcaŭ, jakija źbili jaho 16 vieraśnia.
Zatrymańni «zubroŭcaŭ»
U Miensku 12 kastryčnika padčas raspaŭsiudu ŭlotak da Dnia salidarnaści zatrymali aktyvistaŭ niezarehistravanaj arhanizacyi «Zubr» Maksima Vianiarskaha j Jaŭhiena Alelkava. Na junakoŭ skłali pratakoły za parušeńnie art.143 KaAP (antysanitaryja).
Da Skrabca nie puskajuć
Svajaki byłoha deputata Siarhieja Skrabca 13 kastryčnika paviedamili, što dva miesiacy nia mohuć sustrecca z palitviaźniem. Praces nad im musić raspačacca ŭ listapadzie ŭ Viarchoŭnym sudzie.
Dyrektar škoły suprać RANA
Sud Haradockaha rajonu 14 kastryčnika nie zadavoliŭ pazovu eks-dyrektara Varchoŭskaj bazavaj škoły Leanida Haravoha. Aktyvist BSDP (Hramada) padaŭ u sud na rajonny adździeł adukacyi, patrabujučy adnaŭleńnia na pracy.
Jarašuka prosiać patłumačyć
Prakuratura 14 kastryčnika ŭziała tłumačeńni ŭ kiraŭnika Biełaruskaha kanhresu demakratyčnych prafsajuzaŭ Alaksandra Jarašuka pra jaho zajavy nakont vystupu Alaksandra Łukašenki na vieraśnioŭskim źjeździe Federacyi prafsajuzaŭ. Jarašuk nie vyklučaje, što ŭ dačynieńni da jaho zaviaduć kryminalnuju spravu.
BCHK znoŭ sudzicca
Namieśnik staršyni Vyšejšaha haspadarčaha sudu Jaŭhien Śmirnoŭ 14 kastryčnika apratestavaŭ rašeńnie kalehii VHS, pavodle jakoha byli źniatyja pretenzii padatkovaj słužby da HA «Biełaruski Chelsynski kamitet». Z BCHK sprabujuć spahnać kala 200 tys.dalaraŭ padatkaŭ i štrafaŭ (u ekvivalencie) ź mižnarodnaj dapamohi pa prahramie TASIS.
Sud u Baranavičach
U Baranavičach 14 kastryčnika sud admianiŭ rašeńnie administracyjnaj kamisii harvykankamu, jakaja pakarała aktyvista pradprymalnickaha ruchu Mikałaja Čarnavusa na adnu bazavuju vieličyniu za raspaŭsiud ulotak AHP . U sudzie vyśvietliłasia, što milicyjanty datavali pratakoł 18 žniŭnia, a raspaŭsiud ulotak adbyvaŭsia 20 žniŭnia.
Levanieŭskaha pieravodziać u Miensk
17 kastryčnika ad svajakoŭ Valerja Levanieŭskaha stała viadoma, što palitviaźnia pieravodziać u Miensk, u respublikanskuju turemnuju bolnicu.
Listy Sieviarynca perlustrujuć
Palitviazień Pavał Sieviaryniec zajaviŭ, što niekatoryja jahonyja listy nie dachodziać da adrasataŭ, a inšyja prychodziać padziertymi. Sieviaryniec padaŭ zajavu na imia načalnika Połackaha rajonnaha vuzła paštovaj suviazi Hienadzia Paramonava z patrabavańniem vyśvietlić pryčynu perlustracyi.
«Treci šlach» viarnuŭsia
Sajt internet-supolnaści «Treci šlach» (www.3dway.org) 17 kastryčnika adnaviŭ svaju dziejnaść. Adnak praces pa kryminalnaj spravie aŭtaraŭ «Multklubu» praciahvajecca. Ich abvinavačvajuć u źniavazie honaru A.Łukašenki praz raźmieščanyja na sajcie satyryčnyja multfilmy.
AŠ
Ciapier čytajuć
Foty z Maskvy dajuć pabačyć Pucina i Łukašenku biez hrymu8
Kamientary