U vypadku, kali vybary buduć niesvabodnyja, narod na Centralnaj płoščy pryviadzie da prysiahi taho, «chto zastaniecca ŭ alternatyvie», miarkuje lider KCHP-BNF.
Lider Kanservatyŭna-chryścijanskaj partyi BNF Zianon Paźniak vykłaŭ svoj plan dziejańniaŭ na vybary-2006. U vialikim artykule ŭ ńju-jorskaj hazecie «Biełarus» «Jak stavicca da kandydata ŭ prezydenty ad «demapazycyi» jon reahuje na vybrańnie novym lideram apazycyi Alaksandra Milinkieviča i stavić pierad svaimi prychilnikami niekalki praktyčnych zadač.
Z.Paźniak zaklikaje da masavaj mabilizacyi vybarcaŭ. «Musić być masavy vychad na hałasavańnie. Režym hetaha baicca». Na dumku Z.Paźniaka, tolki vuličnyja akcyi mohuć harantavać abviaščeńnie sumlennych vynikaŭ vybaraŭ: «Prahałasavaŭšy, nielha razychodzicca, a treba kiravacca na centralnuju płošču.
Chaj kožny voźmie z saboj nacyjanalny bieł-čyrvona-bieły ściah. Lozunh — «Adydzi!».
Z.Paźniak ličyć, što «masaj ludziej nie pavinna kiravać publika z demapazycyi. Jany ŭsio pravalać i sapsujuć. Uspomnicie Šareckaha. Heta adna kampanija».
Na hałoŭnaje pytańnie «Za kaho?» Z.Paźniak adkazvaje prahmatyčna: «Kankretny adkaz budzie tady, kali budziem viedać realnych zarehistravanych kandydataŭ, a nia vyniki spektaklaŭ pa maskoŭskim scenary». Takim čynam, jon dapuskaje mahčymaść svajho niaŭdziełu ŭ vybarach.
Na dumku lidera KCHP-BNF, realnaj alternatyvaj Łukašenku moža stać tolki biełaruskamoŭny patryjot Biełarusi, zdolny harantavać demakratyju ŭ krainie. «Istotna, kab siarod kandydataŭ byŭ spabornik, zdolny pravodzić biełaruskuju palityku ŭ intaresach nacyi i dziaržavy», — kaža Z.Paźniak. Što kali takoha nie papuściać da vybaraŭ?
Tady, piša Z.Paźniak, «narod na płoščy (a heta musić być nia mienš za sto tysiač, jak pa zakonie) pavinien pryvieści da prysiahi na viernaść nacyi i Biełarusi taho, chto zastaniecca ŭ alternatyvie (akramia padstaŭnych hajdukievičaŭ, viadoma)».
U časie vybarčaj kampanii, na dumku Z.Paźniaka, pavinien być stvorany hramadzki Kanstytucyjny kamitet, jaki budzie kantralavać prezydenta, pryviedzienaha narodam da prysiahi.
U svaim artykule Z.Paźniak žorstka krytykuje A.Kazulina i V.Frałova za ichni palityčny apartunizm i prarasiejskuju rytoryku. Z.Paźniak krytykuje i «demsiły». Lider KCHP-BNF biare hetaje słovazłučeńnie ŭ dvukośsi, pastajanna dadajučy «tak zvanyja». «Ichniaja dziejnaść, paniaćci i idei, jakija jany vykazvajuć, nie pryvodziać da stvareńnia i zachavańnia nacyjanalnaj dziaržavy (a adpaviedna — i demakratyi, bo demakratyja nie isnuje pa-za dziaržavaj i nacyjaj». Demsiłam — i A.Milinkieviču ŭ pryvatnaści — Z.Paźniak zakidaje kantakty z Maskvoj.
«Jość efektyŭny sposab, jak paźbiehnuć falsyfikacyjaŭ i vyvieści sa stroju falsyfikacyjnuju mašynu, — zapeŭnivaje Z.Paźniak. — Narod (kali zachoča) moža zabiaśpiečyć sabie kantrol nad hałasavańniem». Jak heta zrabić, jon abiacaje napisać paźniej.
Kamientary