Jak biaruć chabar biełaruskija sudździ

Sudździa ź vialikim vopytam

Ukazam Łukašenki Vital Vaščylin byŭ pryznačany sudździoj Śvietłahorskaha rajona Homielskaj vobłaści jašče ŭ 2006 hodzie. U 2011 hodzie Łukašenka padoŭžyŭ jaho paŭnamoctvy jašče na piać hadoŭ, ale ź ich sudździa paśpieŭ adpracavać krychu bolš za hod.

Cikava, što ŭ kryminalnaj spravie sudździ jość źviestki pra toje, što jak minimum z 2008 hoda Vaščylin pačaŭ brać hrošy za pryniaćcie pravilnych rašeńniaŭ.

Heta budzie niaprosta dakazać u sudzie, bo akramia pakazańniaŭ chabaradavalnika hety fakt ničym bolš nie paćvierdžany, ale tym nie mienš epizod u spravie prysutničaje. I ciapier śledčyja prapracoŭvajuć vialiki dośvied sudździ pa razhladzie kryminalnych spraŭ pradprymalnikaŭ i biźniesmienaŭ. Choć KDB i Śledčy kamitet ničoha nie havorać pra spravu, ale mienavita pradprymalniki zabiaśpiečyli hałoŭny dadatkovy dachod padazravanaha.

Sudździu Śvietłahorskaha rajona apieratyŭniki KDB zatrymali padčas atrymańnia chabaru 17 žniŭnia 2012 h., paviedamiŭ Śledčy kamitet, paśla taho, jak pryniaŭ spravu da svajoj vytvorčaści.

Ni pra sumu chabaru, ni pra toje, kim i za što jon pieradavaŭsia, SK ničoha nie paviedamiŭ, painfarmavaŭšy tolki, što padazravanamu inkryminujecca ździajśnieńnie złačynstva pa č. 3 art. 430 (atrymańnie chabaru asobaj, jakaja zajmaje adkaznaje stanovišča).

Usia astatniaja infarmacyja była zasakrečanaja pa toj pryčynie, što skandalnaja sprava sudździ Vaščylina źmiaščaje źviestki, jakija faktyčna dyskredytujuć sudovuju sistemu krainy.

«Ježiednievniku» ŭdałosia vyśvietlić niekatoryja padrabiaznaści spravy.

Tak, u vyniku žurnalisckaha rasśledavańnia było ŭstanoŭlena, što kryminalnuju spravu ŭ dačynieńni da sudździ zavodziŭ asabista staršynia Śledčaha kamiteta Valeryj Vakulčyk (ciapier staršynia KDB).

Pa infarmacyi apieratyŭnikaŭ, heta było zroblena dla taho, kab vyklučyć umiašańnie ŭ chod rasśledavańnia vysokapastaŭlenych svajakoŭ aryštavanaha. Ale sama apieracyja pačałasia zadoŭha da aryštu sudździ.

«Pahardlivy mietał» jak krynica karupcyi

U mai supracoŭnikami pa baraćbie z ekanamičnaj złačynnaściu UUS Homielskaha abłvykankama byli zaviedzienyja kryminalnyja spravy pa č.1 i č.2 art. 223 Kryminalnaha kodeksa (parušeńnie praviłaŭ ab ździełkach z kaštoŭnymi mietałami i kamianiami) u dačynieńni da viadomaha ŭ Homieli juvielirnych spraŭ majstra, zarehistravanaha indyvidualnym pradprymalnikam, jaki maje svaju juvielirnuju majsterniu ŭ mikrarajonie «Paleśsie».

Asnovu dachodu IP składała pryjomka łomu zołata i pierapracoŭka jaho ŭ ekskluziŭnyja juvielirnyja vyraby.

Adnak, zhodna ź biełaruskim zakanadaŭstvam, pradavać juvielirnyja vyraby z kaštoŭnych mietałaŭ, jakija nie majuć prabirnaha klajma Respubliki Biełaruś abo SSSR, zabaroniena. Homielski juvielir pradavaŭ zroblenyja im załatyja vyraby biez klajma, što i stała padstavaj dla zaviadzieńnia spravy.

Cikava, što juvielir trapiŭ u pole zroku pravaachoŭnych orhanaŭ zusim nie vypadkova. U 2008 hodzie jon užo pryciahvaŭsia da adkaznaści za parušeńnie praviłaŭ ab ździełkach z kaštoŭnymi mietałami.

Sprava była paśpiachova rasśledavana i pieradadziena dla razhladu ŭ sud Śvietłahorskaha rajona. Ale sud na ździŭleńnie pabłažliva pastaviŭsia da viny pradprymalnika, choć artykuł Kryminalnaha kodeksa praduhledžvaŭ da vaśmi hadoŭ pazbaŭleńnia voli.

Juvielir choć i byŭ pryznany vinavatym, ale spakojna viarnuŭsia da svajho lubimaha zaniatku. Bolš za toje, u jaho zastałosia i toje zołata, jakoje było kanfiskavana padčas pieratrusu.

Niekatory čas juvielirny majstar bajaŭsia zajmacca niezakonnaj dziejnaściu, a zatym znoŭ pačaŭ aktyŭna handlavać załatymi ŭpryhožvańniami biez prabirnych klejmaŭ. Na hety raz pravaachoŭnyja orhany da apieratyŭnaj raspracoŭcy kryminalnaha juvielira pastavilisia bolš surjozna.

U chodzie travieńskaha zatrymańnia ŭ jaho było kanfiskavana 22 załatyja ŭpryhažeńni, jakija nie majuć prabirnych klejmaŭ Biełarusi ci SSSR na ahulnuju sumu 85 miljonaŭ rubloŭ. Pa dadzienych pravaachoŭnych orhanaŭ, juvielir z 2008 hoda, nie majučy licenzii na ździajśnieńnie ździełak z kaštoŭnymi mietałami i kamianiami, vyrablaŭ z łomu zołata kaštoŭnyja vyraby, jakija realizoŭvaŭ hramadzianam Biełarusi. U spravie prysutničaje mnostva epizodaŭ prodažu załatych zavušnic, branzaletaŭ, łancužkoŭ, piarścionkaŭ. Ale hałoŭnym abjektam rasśledavańnia staŭ zusim nie juvielir, a toj samy sudździa Śvietłahorskaha rajona, jaki razhladaŭ u 2008 hod kryminalnuju spravu i pryniaŭ na ździŭleńnie miakkaje rašeńnie dla padsudnaha. Razumiejučy, što hetym razam vykrucicca budzie składana, juvielir raskazaŭ usio.

Pa słovach juvielira, u listapadzie 2008 hoda jon zapłaciŭ sudździ Vaščylinu chabar u 1 200 dalaraŭ za toje, kab jon nibyta vynies pa jahonaj spravie prysud i pryznačyŭ pakarańnie, nie źviazanaje z pazbaŭleńniem voli.

Mienavita pryznańnia pradprymalnika i stali padstavaj dla taho, kab uziać sudździu ŭ apieratyŭnuju raspracoŭku.

Sudździa siadzić, ale karupcyja kvitnieje

Cikava, što dla apieratyŭnaj raspracoŭki sudździ apieratyŭnikam KDB spatrebiłasia amal dva miesiacy. Pavodle źviestak KDB, jon byŭ zatrymany z dokazami złačynstva paśla atrymańnia čarhovaha chabaru. Adnak vychvalacca ŭsio roŭna asabliva niama čym. Mienavita ŭ hetym pryčyna ŭtojenaści KDB i Śledčaha kamiteta, jakija dali pa spravie na ździŭleńnie biednuju infarmacyju.

Pa pryznańniach samich apieratyŭnikaŭ, karupcyja ŭ sudziejskim korpusie siońnia kvitnieje i hałoŭnaja prablema zaklučajecca ŭ tym, što jaje vielmi składana vyjavić, u adroźnieńnie ad karupcyi ŭ asiarodździ čynoŭnikaŭ.

Čynoŭniki ŭ asnoŭnym sami vymušajuć biźniesmienaŭ i pradprymalnikaŭ davać hrošy, što vyklikaje naturalnaje niezadavalnieńnie apošnich i žadańnie pryniać adpaviednyja miery. Sudździ ni da čaho nie zmušajuć, da ich zvyčajna prychodziać sami: albo padsudnyja, albo ich advakaty, albo pasiaredniki. Karupcyja ŭ asiarodździ sudździaŭ vielmi vyhadnaja tym, chto daje chabar, u adroźnieńnie ad karupcyi ŭ asiarodździ čynoŭnikaŭ.

Jašče adzin niemałavažny momant: sudździ nikoli nie vychodziać za ramki dadzienych im paŭnamoctvaŭ. Kryminalny kodeks sam daje im vialikaje pole dla manieŭru.

Tak, naprykład, u spravie homielskaha juvielira artykuł Kryminalnaha kodeksa praduhledžvaŭ pakarańnie ad abmiežavańnia voli na termin da piaci hadoŭ da pazbaŭleńnia voli na termin da vaśmi hadoŭ z kanfiskacyjaj majomaści abo biez kanfiskacyi. Jak bačna viłka dla pryniaćcia rašeńnia vielizarnaja, a kali jašče prymianić roznyja źmiakčalnyja abstaviny,

to całkam možna pryznačyć pakarańnie nižej za nižejšuju miažu abo ŭmoŭna. A možna adpravić na nary adrazu na 8 hadoŭ.

Usio zaležyć ad rašeńnia sudździ, jakoje ŭ lubym vypadku budzie znachodzicca ŭ ramkach zakona. U Biełarusi ŭžo nie raz uźnimałasia pytańnie ab tym, kab maksimalna źmienšyć pole dla manieŭru sudździaŭ pry vyniasieńni rašeńniaŭ pa kryminalnych spravach. Adnak voz i ciapier tam. Pa hetaj ža pryčynie ŭ Biełarusi praktyčna nie vyjaŭlajecca karupcyjnych złačynstvaŭ siarod sudździaŭ, choć pra ich šeptam kažuć mnohija. Sprava sudździ Vaščylina — heta nie praviła, a chutčej vyklučeńnie z praviłaŭ — vypadkovy kamień, jaki trapiŭ u aharod biełaruskich sudździaŭ. I los jaho taksama zaležyć ad šmatlikich vypadkovaściaŭ.

Niahledziačy na ​​toje, što sudździu ŭziali z dokazami złačynstva, i što ŭ spravie prysutničajuć anałahičnyja epizody jašče 2008 hoda, sudovaja pierśpiektyva spravy, pa pryčynach, apisanych vyšej, vielmi imhlistaja. Tym bolš, što sprava budzie razhladać taki ž sudździa, jaki adrazu ž prymieryć «kašulu» na siabie.

• 0
• 0
• 0
• 0
• 0
• 0
• 0
• 0