Pachavańnie Vajnickaha: žurnalistam pahražali raspravaj za videa i fota

U Vilni siońnia pachavali Ramana Vajnickaha, namieśnika dyrektara Vilenskaj biełaruskaj himnazii imia F. Skaryny, prezidenta Asacyjacyi biełaruskich hramadskich arhanizacyjaŭ Litvy, kiraŭnika kłuba «Siabryna», vice-staršyniu Rady nacyjanalnych supolnaściaŭ Litvy pry Ministerstvie kultury.

Ušanavać jaho pamiać pryjechali biełarusy z usioj Litvy, na cyrymonii sabrałasia kala sotni čałaviek roznych nacyjanalnaściaŭ,

siarod mnostva kvietak i viankoŭ stajali raźvitalnyja paštoŭki, zroblenyja vučniami himnazii,

Ramana Vajnickaha ŭ Vilni zhadvajuć jak dziejača, jaki nie padtrymlivaŭ ni režym u Biełarusi, ni supraciŭ režymu, jaki imknuŭsia abjadnać i prymiryć biełarusaŭ Litvy niezaležna ad ich palityčnych pohladaŭ, jak dobraha i vietlivaha da ŭsich čałavieka.

Ciapier, kali na pachavańnie sabralisia z usioj Litvy biełaruskija aktyvisty samych roznych pohladaŭ, jakija daŭno nie bačylisia i nie razmaŭlali adzin z adnym, jany sumna paŭtarali: «Voś spadar Raman i sabraŭ nas usich razam».

Žurnalisty biełaruskich niezaležnych ŚMI, akredytavanyja dla pracy ŭ Litvie MZS ŁR, adnak, nie zmahli rabić videa- i fotazdymki ŭ časie raźvitańnia z adnym ź lidaraŭ biełaruskaj dyjaspary ŭ Litvie.

Vykonvać prafiesijnuju pracu ŭ hramadskim miescy žurnalistam nie dali nieviadomyja rasiejskamoŭnyja mužčyny, jakija abražali žurnalistaŭ radyjo «Svaboda» i TV «Biełsat» z užyvańniem niecenzurnych słovaŭ i pahražali im fizičnaj raspravaj,

Nieviadomyja nie pradstavilisia, ale pabačyŭšy dakumienty ab akredytacyi žurnalistaŭ u Litvie, zajavili, što havorać nibyta ad imia siamji.

Syn zahibłaha skazaŭ, što nie maje ničoha suprać asobaŭ žurnalistaŭ, jakija pracujuć dla radyjo «Svaboda» i TV «Biełsat» u Litvie. Paźniej nieviadomyja vyklikali jaho i prymusili pry ich zajavić, što siamja zabaraniaje ŭsie fota- i videazdymki ŭ časie pachavańnia.

Apieratar TV «Biełsat» Ździsłavas Vajciachoŭskis adyšoŭ z kamieraj prykładna na sotniu mietraŭ ad vychadu z Pachavalnaha biuro i padrychtavaŭsia zdymać, jak buduć vynosić trunu i jak buduć vychodzić ludzi.

Prajšli biełaruskija dypłamaty, aktyvisty pačali vynosić vianki.

Jak tolki z zały pačali vychodzić ludzi, inšyja nieviadomyja rasiejskamoŭnyja maładyja mužčyny padbiehli da kamiery, zakryli rukoj abjektyŭ i zapatrabavali syści.

Dvoje nieviadomych nie pradstavilisia, adzin ź ich razmaŭlaŭ abraźliva i ahresiŭna, ź niecenzurnymi słovami, druhi trymaŭsia vietliva. Jany nie patłumačyli pryčyny, čamu jany zaminajuć pracy žurnalistaŭ, akredytavanych u hetaj krainie, vykonvać svaju prafiesijnuju pracu ŭ hramadskim miescy i ździekliva paraili źviarnucca ŭ palicyju.

Jak tolki adzin z žurnalistaŭ patelefanavaŭ u palicyju, i nieviadomyja pačuli, što palicyja zaraz pryjedzie, jany ŭciakli.

Vilenski kamisaryjat palicyi zafiksavaŭ skarhu žurnalistaŭ Taciany Pokład i Ździsłavasa Vajciachoŭskisa, hramadzianaŭ Litvy, akredytavanych MZS ŁR dla pracy ŭ hetaj krainie. Da zajavy ab pieraškodach i pahrozach žurnalistam niezaležnych biełaruskich ŚMI, akredytavanych ŭ Litvie, buduć dadadzienyja i videa i hukavyja zapisy nieviadomych i ich pahrozaŭ žurnalistam.

* * *

Ramana Vajnickaha znajšli zabitym 6 sakavika. Litoŭskaja palicyja pravodzić rasśledavańnie zabojstva. Žorstkaje zabojstva šakavała mnohich u Litvie i Biełarusi, vykazvajucca mnostva viersijaŭ. Litoŭski parłamentar Arvidas Anušaŭskas, čalec Kamitetu nacyjanalnaj biaśpieki i abarony Sojmu Litvy raniej adznačyŭ, što lidar biełaruskaj dyjaspary, jaki imknuŭsia nia ŭciahvać biełarusaŭ u akcyi pratestaŭ nacyjanalnych mianšyniaŭ u Litvie suprać litoŭskich zakonaŭ, moh zaminać Rasiei ŭ jaje sprobach abjadnać nacyjanalnyja supolnaści suprać litoŭskaj dziaržavy. Bolšaść blizkich da Vajnickaha ludziej zajavili, što pierad śmierciu Vajnicki skardziŭsia na pahrozy i byŭ amal u panicy.

Staršynia sajuzu biełarusaŭ Łatvii Valancina Piskunova zajaviła, što, na jaje dumku, Vajnickaha zabiła biełaruskaja apazicyja.

• 0
• 0
• 0
• 0
• 0
• 0
• 0
• 0