U albomach Belarus Press Photo KDB i ideołahi znajšli ekstremizm, budzie sud
Pra heta paviedamiła ŭ svaim akaŭncie ŭ fejsbuku žurnalistka Julija Daraškievič.
Nahadajem, što 41 fotaalbom sa zdymkami pryzioraŭ minułahodniaha konkursu «Belarus Press Photo» byli kanfiskavanyja 12 listapada 2012 hoda na pamiežnym pierachodzie «Kamienny Łoh», na miažy ź Litvoj, u biełaruskich fatohrafaŭ Alaksandra Vasiukoviča i Julii Daraškievič. U kancy listapada Ašmianskaje adździaleńnie mytni prainfarmavała Vasiukoviča, što drukavanaja pradukcyja pryznajecca niezakonnaj i padlahaje źniščeńniu. Potym było vyrašana nie źniščać albomy, ale ich i nie viarnuli fatohrafam, a pieradali ŭ KDB.
Ciapier albomy prajšli «ekśpiertyzu», u jakoj na zamovu śpiecsłužby paŭdzielničali ideołahi Hrodzienskaha abłvykankama i supracoŭniki Hrodzienskaha ŭniviersiteta.
U adkazie, prysłanym Julii Daraškievič, havorycca, što ŭ albomach utrymlivajucca «naŭmysna skažonyja, nie adpaviednyja rečaisnaści vydumki pra žyćciadziejnaść Respubliki Biełaruś u palityčnaj, ekanamičnaj, sacyjalnaj i inšych śfierach, jakija prynižajuć nacyjanalny honar i hodnaść hramadzian Biełarusi.
Padborka materyjałaŭ alboma ŭ sukupnaści adlustroŭvaje tolki niehatyŭnyja aśpiekty žyćciadziejnaści biełaruskaha naroda… źmianšaje aŭtarytet dziaržaŭnaj ułady, padryvaje davier da orhanaŭ ułady ŭ boku zamiežnych dziaržaŭ, zamiežnych abo mižnarodnych arhanizacyj».
U adpaviednaści z art. 1 Zakona RB «Ab supraćdziejańni ekstremizmu, dziejnaść hramadzian pa ździajśnieńni dziejańniaŭ, skiravanych na prynižeńnie nacyjanalnaha honaru i hodnaści źjaŭlajecca ekstremisckaj».
Belarus Press Photo — heta štohadovy konkurs najlepšych fatahrafij, zroblenych dla ŚMI. U albom jaho pryzioraŭ za 2011 hod trapili ŭ tym liku šmatlikija foty z Maŭklivych pratestaŭ leta 2011 hoda. Niahledziačy na kanstytucyjna zamacavanaje prava na svabodu schodu, faktyčna hramadzianie Biełarusi nie majuć prava na pratest. Praviadzieńnie vuličnych akcyj rehłamientavana tak, kab abmiežavać mahčymaści ich praviadzieńnia i zbor ludziej.Heta vyklikana stracham uładaŭ pierad narodnymi vystupami suprać adsutnaści ŭ krainie svabodnych vybaraŭ i parušeńniaŭ pravoŭ čałavieka. U vyniku ŭ 2011 hodzie ludzi stali vychodzić na vulicy biez łozunhaŭ i skandavańniaŭ, prosta plaskajučy ŭ dałoni. Demanstracyi adbylisia ŭ troch dziasiatkaŭ haradoŭ krainy. Kab spynić ich, ułady zatrymali i dapytali ŭ KDB niekalki socień čałaviek.
Ciapier fatohrafaŭ Juliju Daraškievič i Vadzima Zamiroŭskaha, arhanizataraŭ konkursa Belarus Press Photo, vyklikajuć u sud. Jon maje prajści 17 krasavika ŭ Ašmianach.Sud i maje pryniać rašeńnie ab tym, ci sapraŭdy albom «ekstremiscki». KDB i raniej sprabavała dabicca abviaščeńnia ekstremisckimi šerahu vypuskaŭ niezaležnych haziet, časopisaŭ, knih. Adnak ni razu takoje rašeńnie nie było pryniata sudom.
Taja samaja fotahalereja pieramožcaŭ konkursu ŭ 2011 h.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj29
Kamientary