Edvard Snoŭden: «Ja nie chaču žyć u śviecie, dzie ŭsio, što ja rablu i havaru, zapisvajecca»

Stała viadomaje imia čałavieka, jaki raskryŭ sakretnuju infarmacyju pra zbor śpiecsłužbami ZŠA źviestak ab hramadzianach. Hazieta The Guardian apublikavała intervju z 29-hadovym Edvardam Snoŭdenam, u jakim jon raskazaŭ pra pryčyny, što padšturchnuli jaho raskryć infarmacyju pra dziejańni śpiecsłužbaŭ.

Snoŭden raniej pracavaŭ u CRU i Ahienctvie nacyjanalnaj biaśpieki, a ciapier supracoŭnik Booz Allen Hamilton, arhanizacyi, jakaja pracuje na abaronnuju pramysłovaść ZŠA.

Snoŭden skazaŭ haziecie, što «nie moh dapuścić, kab urad ZŠA padryvaŭ pryvatnaje žyćcio, svabodu ŭ internecie i asnoŭnyja pravy ludziej pa ŭsim śviecie z dapamohaj hihanckaj, tajemna zbudavanaj špijonskaj mašyny».

Chłopiec kaža, što źliŭ infarmacyju ŭ ŚMI paśla «doŭhich i ciažkich rozdumaŭ»: «Ja nie chaču žyć u śviecie, dzie ŭsio, što ja rablu i havaru, zapisvajecca i nie chaču suŭdzielničać u vybudovie hetaha».

Raniej paviedamlałasia, što amierykanskaja telekamunikacyjnaja kampanija Verizon Communications pavinnaja štodnia pieradavać Ahienctvu nacyjanalnaj biaśpieki ZŠA źviestki ab telefanavańniach miljonaŭ klijentaŭ.

Dyrektar nacyjanalnaj raźviedki ZŠA Džejms Kłepier asudziŭ dziejańni žurnalistaŭ, zajaviŭšy, što ahałoska rašeńnia suda ab prasłuchoŭvańni telefonaŭ pahražaje nacyjanalnaj biaśpiecy Złučanych Štataŭ.

Ciapier Edvard Snoŭden znachodzicca ŭ Hankonhu i spadziajecca, «što ŭłady nie vydaduć jaho Złučanym Štatam». Kali nie Hankonh, to, spadziajecca jon, prytułak jamu moža dać Isłandyja.

Snoŭden pracavaŭ na Havajach i zarablaŭ 200 tysiač dalaraŭ za hod. Bajučysia pomsty śpiecsłužbaŭ, Snoŭden nikomu nie havaryŭ pra svoj budučy vyjezd u Hankonh. Svajmu načalstvu ŭ supiersakretnym Ahienctvie nacyjanalnaj biaśpieki jon skazaŭ, što jedzie na try tydni na kurs lekavańnia ad epilepsii. Jon raskazaŭ hazietčykam z «Hardyjan», što pry nabory parolaŭ na svaim kampie nakryvajecca čyrvonym kaŭpakom, kab ich nie padhledzieli schavanyja videakamiery. Za čas svajho pierabyvańnia ŭ Hankonhu jon amal nie vychodziŭ z hatela.

Snoŭdena možna paraŭnać z Bredli Meninham, jaki vyklikaŭ skandał ź Vikiliksam.

Kiraŭnictva amierykanskich i brytanskich śpiecsłužbaŭ abaraniajuć palityku ZŠA pa zbory źviestak. Na ich dumku, jana nijak nie parušaje žyćcia i pryvatnaści dobrych ludziej, ale dazvalaje raskryvać terarystaŭ i złačyncaŭ.

Takuju sama dumku vykazaŭ staršynia prafsajuza niamieckaj palicyi. Mnohija pravyja palityki taksama abaraniajuć prava dziaržavy na aktyŭnaje zmahańnie sa złačynnaściu i teraryzmam. A voś libieralnyja i levyja siły patrabujuć zabarony na manitorynh elektronnaj pošty i telefonnych razmovaŭ bieź indyvidualnaj sankcyi suda.

• 0
• 0
• 0
• 0
• 0
• 0
• 0
• 0