Valejbalisty ŭ Biełarusi zarablajuć i pa 6 tysiač dalaraŭ, ale valejbolnaj zały ŭ Minsku niama nivodnaj

Sioleta žanočaja i mužčynskaja valejbolnyja
zbornyja vystupajuć tryŭmfalna. Abiedźvie kamandy hulajuć u finalnych turnirach čempijanataŭ Jeŭropy. Takoje zdaryłasia ŭpieršyniu.

Adnak dniami ŭ «Presbole» byŭ nadrukavany niečakany list ad imia našych valejbalistak-zbornic.

«Znoŭ uźnikła prablema z ekipiroŭkaj. Da pieršaha matča čempijanatu Jeŭropy zastajucca ličanyja dni, a ŭ nas niama navat hulniavoj formy, nie kažučy ŭžo pra abiacanyja kurtki i sumki. Niama i krasovak — ich nam paraili čakać paśla 20 vieraśnia. Praŭda, da taje pary čempijanat Jeŭropy ŭžo
zavieršycca…»

U ananimnym liście chapaje krytyki ŭ bok kiraŭnictva kamandy i
Fiederacyi. Taksama napisana, što valejbalistki hulajuć za hałoŭnuju kamandu krainy (vy pavaliciesia z kresła) biez zarpłaty. I heta pry takich pośpiechach!

Apieratyŭna dazvanicca da žanočaj zbornaj u Hiermaniju, dzie 6 vieraśnia startuje čempijanat Jeŭropy, nie ŭdałosia. Ale ŭ Biełaruskaj fiederacyi valejboła źviazali z načalnicaj mužčynskaj kamandy Ałaj Ciacierynaj, jakaja vałodaje mnohimi pytańniami.

— Dziŭna, što dziaŭčaty prabilisia na čempijanat Jeŭropy i nie majuć krasovak, kab hulać…

Ała Ciacieryna: Sprava voś u čym. Pradukcyja pavinna
była być imiannoj, firmovaj, za košt italjanskaj firmy ASIKS. Bo svaich hrošaj u nas amal niama. Ale italjancy abjavili na lipień-žnivień vakacyi. Pryniali našu zamovu pozna. Tamu pradukcyja pryjdzie, ale sa spaźnieńniem. A pa mužčynskaj kamandzie, jana taksama chutka startuje na čempijanacie Jeŭropy, usio budzie dobra.

— Vychodzić, dziaŭčaty pajechali chto ŭ čym…

Ała Ciacieryna: Kali hulali adboračnyja matčy
čempijanatu śvietu, to ŭsio atrymali. Praviali ŭ toj ekipiroŭcy paru hulniaŭ. A čamu dziaŭčaty ŭ Minsku nie atrymali inšyja krasoŭki, ja nie viedaju. Mahli ŭziać ich na bazie. Nas papiaredžvali, što poŭnaj ekipiroŭki nie budzie, ale ŭsio nieabchodnaje majecca. U dadzienaj situacyi prablema ŭźnikła tamu, što ekipiroŭka zatrymałasia z-za razmytnioŭki i inšych
biurakratyčnych pracedur. I ad taho, što valejbalistki vyrašyli napisać pra adsutnaść krasovak, mašyna raniej nie pryjdzie.

— U tym liście napisana, što prablema z ekipiroŭkaj uźnikła nie ŭpieršyniu.

Ała Ciacieryna: Ministerstva sportu nie ekipiruje jak 
naležyć nacyjanalnyja valejbolnyja kamandy. Škarpetak navat nie dali. Usiu nošu ŭzvalili na Biełaruskuju fiederacyju valejboła, jakaja nie maje sponsaraŭ.
Tamu my ŭvieś čas u pazykach, škada hladzieć na našaha dyrektara Barysa Vasiljeviča (Baturu, pa sumiaščalnictvie kiruje Minabłvykankamam). Jon, viadoma, vyrašaje pytańni, dziakuj Bohu. Ale niakiepska było b mieć dva-try hienieralnyja sponsary, jakija b dapamahali. A hrošaj treba
šmat: ŭsie kamandy patrapili na čempijanat Jeŭropy i śvietu. Niebyvały pośpiech. Dziry łatajucca za košt unioskaŭ, udałych tranśfieraŭ.

— Niaŭžo biełaruskija valejbalisty hulajuć za biaspłatna? Pra heta taksama apaviadajecca ŭ liście. Heta nievierahodna!

Ała Ciacieryna: U Fiederacyi niama hrošaj, kab usio było
hodna. Zhulali našy valejbalisty ŭdała — i na premii hrošaj niama.
Pavodle našych zakonaŭ, premija moža być, tolki kali ŭ finale na čempijanacie Jeŭropy zojmieš miesca na pjedystale. Pieršaje, druhoje, treciaje. Ale heta nievierahodny vynik. Jakimi kryterami kirujecca Minsportu, niezrazumieła.

— Nie možam uciamić, jak pry takich umovach našy prabilisia ŭ finalnyja stadyi čempijanataŭ.
Ała Ciacieryna: Usio zdaryłasia nasupierak łohicy i
ŭmovam. U nas niama navat valejbolnych załaŭ. Chakiejnych karobak šmat, a zały ŭ Minsku niama nivodnaj. Kab pravodzić zbory valejbalistaŭ, my jedziem u Maładziečna. Zału tam zbudavali dobruju, ale jość prablemy z 
pražyvańniem i charčavańniem.

— Na valejboł u nas redka źviartajuć uvahu. Choć u 
toj ža Polščy hety vid sportu, vidać, na ŭsich telekanałach štodnia. Chto hulaje ŭ toj ža mužčynskaj zbornaj Biełarusi, za jakuju vy adkazvajecie?

Ała Ciacieryna: Naprykład, Aleh Achrem, jaki vystupaje ŭ
Polščy. Jon štohod atrymlivaje zvańnie najlepšaha hulca ich čempijanatu. Jon tam zorka-pryzorka, jaho paznajuć paŭsiul. Naš Antanovič Siarhiej hulaje ŭ Turcyi, jamu znoŭ praciahnuli kantrakt. U zbornaj šmat hulcoŭ z «Šachciora» (Salihorsk), jaki hulaje ŭ rasijskaj Supierlizie. A bolšaść našych hulcoŭ usio ž ź minskaha «Budaŭnika». Trenier u nas Sidzielnikaŭ — z 
Rasii. Jon zbornuju rychtavaŭ čatyry hady, i ŭsio ž jany vyjšli ŭ finał čempijanatu Jeŭropy. Upieršyniu ŭ historyi. A paśla budzie druhi etap kvalifikacyi da čempijanatu śvietu.

— Kolki zarablajuć u žanočaj zbornaj? Skažam, valejbalistki, jakija hulajuć u Biełarusi.

Ała Ciacieryna: Ja nie viedaju. Mahčyma, tysiačy pa dźvie
dołaraŭ. Što tyčycca mužčyn, to ŭ Biełarusi jość hulcy, jakija zarablajuć i 6 tysiač dołaraŭ. Za miažoj — jašče bolš. Choć i da nas pryjazdžajuć ź Jeŭropy ŭ Biełaruś zarablać hrošy.

• 0
• 0
• 0
• 0
• 0
• 1
• 0
• 0