«Łučynka» — novaja kniha dla siamiejnaha čytańnia ad aŭtaraŭ «Azbukoŭnika i ličyłki»
Novaje vydańnie pastupić u prodaž u bližejšyja dni.
Hod tamu ŭ vydaviectvie «Mastackaja litaratura» vyjšła čytanka dla dziaciej «Azbukoŭnik i ličyłka», układzienaja Zosiaj Kustavaj i aformlenaja mastakom Uładzimiram Paščaścievym.
Tuju knihu raskupili vokamhnienna. Z 2000 asobnikaŭ u kniharni trapiła ŭsiaho 150, usio astatniaje zamovili biblijateki.
I voś ciapier čytačam prapanujecca novaja kniha «Łučynka». Vydańnie pryznačanaje dla siamiejnaha čytańnia. Układalnik knihi — Zosia Kustava, aŭtar idei — Valancina Sałaŭjova. Asobnaj uvahi zasłuhoŭvaje Maja Prakapovič — mastak-ilustratar.
«Maładaja talenavitaja mastačka Maja Prakapovič zdoleła dakładna pierakłaści na movu vyjaŭlenčaha mastactva idei vykazanyja movaju słovaŭ», — kaža ŭkładalnik knihi.
— «Fiłasofskaje, simvaličnaje i indyvidualnaje ŭspryniaćcie mastakom-ilustrataram śvietu nasyčaje i raskviečvaje teksty, stvaraje atmaśfieru lohkaj niazmušanaj hutarki pamiž tvoram i malunkam, dzie, razam z tym, čutno poŭnaje suładździe surazmoŭcaŭ.
Tonki kałaryt raskviečvaje zakładzienuju metu aśviety i vykryvaje biaskoncaść novych adcieńniaŭ śviatła łučynki, dzie adnoj vysakarodnaj idejaj prasiaknuta kožnaja staronka knihi. Hetaja vysakarodnaja ideja i šmathałosaja palitra vobrazaŭ tryvała źnitavany supracaj mastaka i ŭkładalnikaŭ».
Čamu «Łučynka»
Novaja kniha nievypadkova atrymała nazvu «Łučynka». Voś što pra jaje pachodžańnie raskazvajuć jaje stvaralniki.
«Łučynka (ad słova łučyna) — doŭhaja, suchaja, zazvyčaj sasnovaja z pryjemnym smalanym pacham ščepka, jakoj daŭniej aśviatlali sialanskija chaty. Słova «łučynka» źviazana z pryrodaj, z čałaviekam, ź jaho pobytam, žytłom, jakaja svaim tajamničym kazačnym śviatłom jana rabiła ŭtulnaj.
Raniej pry łučynie vykonvali raznastajnuju pracu, śviatkavali, spraŭlali viasielli, sumavali, čytali. Jaje čaradziejnaje śviatło zavarožvała, trymała la siabie mahičnaj siłaj žyvoha ahniu.
Kniha atrymała takuju nazvu «Łučynka», tamu, što jana niasie śviatło, a značyć aśvietu, navučańnie, adukacyju. Amal sto hadoŭ tamu biełaruskaja paetka Ciotka (Ałaiza Paškievič) była redaktaram adnajmiennaha časopisa».
Dla kaho «Łučynka»
Siońniašniaja čytanka «Łučynka» — heta indyvidualnaja samastojnaja škołka-vučelnia pa avałodvańni vusnaj rodnaj movaj, umoŭna kažučy — škołka dla małych i vučelnia dla darosłych.
Aŭtary ŭpeŭnieny, što kazačnaje ŭvasableńnie žyvoha ahniu škołki-vučelni «Łučynka» aśviecić dalejšy šlach usim, chto dałučycca da vyvučeńnia i bolš hłybokaha ŭsprymańnia rodnaj movy praz słova, słovazłučeńnie, skaz i tekst.
Pra što «Łučynka»
Čytačy zmohuć paznajomicca z kulturaj movy i pavodzin, moŭnym etykietam na asnovie tvorčaha padychodu da litaraturnaha materyjału, što, na dumku aŭtaraŭ, spryjaje bolš hłybokamu zasvajeńniu kłasičnych i sučasnych tvoraŭ biełaruskich piśmieńnikaŭ. U knizie jość raździeł i dla amataraŭ paetyčnych radkoŭ suśvietna viadomych paetaŭ u pierakładzie na biełaruskuju movu.
«Łučynka» znajomić čytačoŭ z vytokami pryhažości rodnaj movy, vučyć spaznavać i razumieć załacinki narodnaj mudraści, karystacca kryłatymi vysłoŭjami, umieć razvažać i žartavać.
«Łučynka» ŭtrymlivaje kankretnyja praktyčnyja zadańni, zasnavanyja na materyjale rodnaha słova ź litaraturnych tvoraŭ biełaruskich i zamiežnych piśmieńnikaŭ, vusnaj narodnaj tvorčaści, jakija mohuć vykarystoŭvacca ŭ siamiejnaj piedahohicy, vychavalnikami daškolnych ŭstanoŭ, nastaŭnikami pačatkovych, siarednich i starejšych kłasaŭ na ŭrokach.
«Łučynka» — heta siamiejnaja čytanka dla dziaciej i darosłych, kniha dla ŭsich biełarusaŭ.
Nakład nova knihi składzie 2500 asobnikaŭ, u bližejšyja dni «Łučynka» źjavicca ŭ prodažy pa kniharniach Biełarusi — 250 ekzemplaraŭ zamoviła BiełKniha.
Kamientary