Staršyniu sienata Jeŭrapiejskaha humanitarnaha ŭniviersiteta, jaki pracuje ŭ Vilni prafiesara departamienta historyi Paŭła Cieraškoviča zvolnili z univiersiteta. Zahad za podpisam prarektara Biernardasa Hajlusa ab daterminovym skasavańni kantrakta, termin jakoha zakančvajecca ŭ vieraśni 2014 hoda, Cieraškovič atrymaŭ 5 lutaha.
Nahadajem, u kancy studzienia rektar EHU Anatol Michajłaŭ admoviŭ u praciahu pracoŭnaha kantrakta Cieraškoviču. Sienat univiersiteta vykazaŭ pryncypovuju niazhodu z hetym rašeńniem i źviarnuŭsia da hienieralnaj asamblei suzasnavalnikaŭ univiersiteta i kiraŭnickaha savieta z prośbaj admianić jaho.
Kamientujučy fakt daterminovaha skasavańnia kantrakta, Cieraškovič skazaŭ, što rasceńvaje heta jak «niervovy krok administracyi, isteryčnuju reakcyju na padziei, što adbyvajucca va ŭniviersitecie».
«Niama takoha ŭ suśvietnaj praktycy, kab rektar zvalniaŭ staršyniu sienata», –– skazaŭ prafiesar. Na dumku Cieraškoviča, jaho zvalnieńnie adbyłosia mienavita zaraz, kab jon nie moh uziać udzieł u kanfierencyi donaraŭ EHU, jakaja pavinna prajści 18 lutaha ŭ Vilniusie. Bo skasavańnie pracoŭnaha dahavora, skazaŭ Cieraškovič, aznačaje i anulavańnie prava na žycharstva ŭ Litvie.
Prafiesar taksama źviarnu ŭvahu, što ŭ spravazdačy Jeŭrapiejskaj kamisii asacyjacyi ŭniviersitetaŭ, jakaja pravodziła atestacyju EHU ŭ 2013 hodzie, adznačanyja šerah parušeńniaŭ u sistemie mieniedžmientu ŭniviersiteta. U pryvatnaści kamisija zaŭvažyła, što pazicyja provasta (pieršaha prarektara), zasnavanaja ŭ śniežni 2013 hoda, nie prapisana ŭ statucie. Rekamiendavana źmianić skład kiraŭnickaha savieta ŭniviersiteta, uklučyŭšy tudy studentaŭ i pradstaŭnikoŭ hramadzianskaj supolnaści. «Zaŭvahi spravazdačy, –– skazaŭ Cieraškovič, –– supadajuć z tym, pra što havoryć demakratyčnaja płatforma «Za novy EHU».
Cieraškovič zaznačyŭ, što kiraŭnicki saviet univiersiteta moža admianić rašeńnie rektara, na što jon i spadziajecca.
«Jašče ŭčora ja prymaŭ ekzamien u EHU, i ŭ mianie ŭźnikła dumka: a raptam heta moj apošni ekzamien? Kaliści mianie prymusili pakinuć BDU, u tym liku z-za supracoŭnictva ź EHU. Dumaju, zaraz mnie viartacca niama kudy, u Biełarusi pracu va ŭniviersitecie ja nie znajdu», –– skazaŭ prafiesar.
U siaredzinie studzienia ŭ EHU znoŭ abvastryŭsia kanflikt pamiž administracyjaj i sienatam VNU, źviazany z praviadzieńniem reformy prafiesarska-vykładčyckaha składu ŭniviersiteta. Administracyja nastojvaje, što źmieny adbyvajucca ŭ suviazi z nastupnaj akredytacyjaj VNU dla palapšeńnia ŭmoŭ pracy vykładčykaŭ i adpaviadajuć normam Minadukacyi Litvy. U svaju čarhu pradstaŭniki demakratyčnaj płatformy «Za novy EHU» zajaŭlajuć, što pry abviaščeńni konkursu na zamiaščeńnie vykładčyckich pasadaŭ administracyja ŭniviersiteta naŭprost ŭmiašałasia ŭ dziejnaść sienata i faktyčna prysvoiła jaho paŭnamoctvy.
Płatformu «Za novy EHU», jakaja atrymała bolšaść na vybarach u sienat univiersiteta 19 listapada, stvaryła hrupa vykładčykaŭ, niazhodnych z «aŭtarytarnym stylem kiravańnia» administracyi.
***
Jeŭrapiejski humanitarny ŭniviersitet byŭ adkryty ŭ Minsku ŭ 1992 hodzie. U 2004 hodzie biełaruskija ŭłady, niezadavolenyja samastojnaściu jaho kiraŭnictva, zakryli VNU. U 2005 hodzie EHU adnaviŭ pracu ŭ Vilni ŭ statusie biełaruskaha ŭniviersiteta ŭ vyhnańni.
Tolki žminda i lanivy nie padtrymlivaje «Nivy»! Vy možacie za chvilinu padtrymać «NN» padachodnym, nie patraciŭšy ni kapiejki svaich5
Kamientary