Chto takaja Ała Cupier? Piać faktaŭ pra biełaruskuju alimpijskuju čempijonku

Chacieła skončyć karjeru

Ale ŭžo 34 hady. Dla spartoŭki, dy jašče ŭ akrabatyčnym vidzie sportu, uzrost davoli pavažany. Choć, kažuć, u pašparty damam nie pryniata zazirać. Dva hady tamu Cupier naradziła dzicia, paŭtara hoda była biez trenirovak, tamu ŭdzieł u Alimpijadzie zastavaŭsia pad vialikim sumnievam.

U lutym minułaha hoda na emocyjach jana navat skazała: «Hety siezon byŭ apošnim». Praŭda, užo ŭ vieraśni pamianiała rašeńnie. Faktyčna, jaje paprasili daciarpieć da Sočy, bo zamieny prosta nie mahli znajści. Udała paciarpieła. Choć bukmiekiery i aceńvali šancy biełarusy krajnie nizka. U jaje pieramohu nichto nie vieryŭ.

Va Ukrainie paličyli niepierśpiektyŭnaj

Ała naradziłasia ŭ horadzie Roŭna. I svaju pieršuju Alimpijadu 1998 hoda praviała za «žoŭta-błakitnych». Tam jana i zaniała rekordnaje da siońnia miesca — piataje. Potym było try Alimpijady ŭ składzie Biełarusi, ale toj vynik pieraŭzyści nie atrymlivałasia: 2002 — 9-je, 2006 — 10-je, 2010-y…

«U Biełarusi ja ŭžo adčuvaju siabie jak doma, choć spačatku davodziłasia nialohka. Nieznajomaja kraina, novyja ludzi», — kazała Ała. Jaje, a taksama jašče čatyroch spartoŭcaŭ u Biełaruś, a bolš dakładniej, u Homiel, pryvioz zasłužany trenier Ukrainy Viktar Šviedaŭ. «Kali ja b vystupała za Ukrainu, to nie zmahła b dasiahnuć tych pośpiechaŭ». Va Ukrainie ž na Cupier byli prosta pastavili kryž jak na niepierśpiektyŭnaj.

«Vakoł hory i mnoha karovaŭ»

Kaža, što na zborach addaje pieravahu kampjutarnym hulniam i čytańniu knižak. Siarod lubimych knih nazyvała «Siastru Kiery» Drajzera i «Majstra i Marharytu» Bułhakava. «Muzyku mahu słuchać lubuju. Siońnia — kłasičnuju, a zaŭtra — rok», — kazała jana.

Najpryhažejšaj krainaj, u jakoj davodziłasia byvać, nazyvaje Šviejcaryju. «Vakoł hory i mnoha karovaŭ». Skončyła Homielski dziaržaŭny ŭniviersitet pa śpiecyjalnaści «trenier-vykładčyk».

Traŭmy mučać

Viadoma, jak i ŭsich frystajlistaŭ, traŭmy nie abychodzili bokam Ału Cupier. «Zaŭsiody padčas adkaznaha startu atrymaju traŭmu. Chacia, mnie vielmi časta zdajecca, što traŭmy — heta psichałahičnaje».

Byli i kryŭdy na biełaruskich funkcyjanieraŭ. «U minuły raz u Maskvie apieravali. Ja potym 10 dzion nie mahła na nahu stać. Ciapier mianie siabry Daščynskaha «sasvatali» da adnaho viadomaha amierykanskaha doktara. U vyniku na čaćviorty dzień pajšła biez mylicaŭ. Samaje kryŭdnaje — što kamandnamu doktaru da mianie zusim spravy nie było. Ja šukała lekara, vyzvańvała strachavuju kampaniju, rabiła mahnitna-rezanansnuju terapiju, chadziła na abśledavańnie. Usio sama, z chvoraj nahoj», — tak kazała Cupier u 2009 hodzie.

Pierad Alimpijadaj u Vankuviery Cupier złamała łapatku. Faktyčna na toj Alimpijadzie jana vystupała na abiazbolvajučych. Frystajł — traŭmaniebiaśpiečny sport.

Pakul nie paznavali na vulicach

U frystajł Cupier pryjšła z himnastyki. Heta standartny šlach. Zajmacca zimovaj akrabatykaj pačała ŭ 13 hadoŭ. «Kaniečnie, pačućcio stracha frystajlistam viadomaje. Pamiataju, jak dryžali kalenki pierad pieršym skačkom. Pamiataju, jak tolki padniałasia, trenier skazaŭ: «Ała, davaj jašče. Druhi raz — nie tak strašna».

Cupier kazała, što na vulicach Minska jaje nie paznajuć, u adroźnieńnie ad Hryšyna i Daščynskaha. Ciapier pavinny paznavać.

• 0
• 0
• 0
• 0
• 0
• 0
• 0
• 0