Novy lidar vieniesuelskaj apazicyi Leapolda Łopies zaklikaŭ suhramadzian vyjści na marš pratestu 18 lutaha i paabiacaŭ pryjści na akcyju sam. Videazvarot palityka źjaviŭsia ŭ noč na paniadziełak, 17 lutaha, u jaho mikrabłohu.
Marš, pa słovach Łopiesa, pavinien prajści ad płoščy Vieniesueły ŭ Karakasie da budynka ministerstva justycyi, «jakoje stała simvałam represij, katavańniaŭ i chłuśni». Apazicyjanier paprasiŭ prychilnikaŭ nadzieć biełaje, kab paćvierdzić svaju prychilnaść mirnamu dyjałohu.
Łopies sfarmulavaŭ try patrabavańni da ŭładaŭ.
Pa-pieršaje, nieabchodna rasśledavać hibiel ludziej 12 lutaha pa-druhoje, vyzvalić studentaŭ, zatrymanych za ŭdzieł u pratestach, i, pa-treciaje, razzbroić praŭradavyja vajenizavanyja hrupoŭki.
«Narešcie, ja budu tam sam, kab pakazać svoj tvar. Mnie niama čaho bajacca. Ja nie ździejśniŭ nijakich złačynstvaŭ. Kali jość zahad niezakonna mianie aryštavać, što ž, ja budu tam», — dadaŭ palityk.
Miescaznachodžańnie apazicyjaniera nieviadoma ź sierady. Jak nahadvaje BBC News, raniej u niadzielu palicyja abšukała doma Łopiesa i jaho baćkoŭ. Nieŭzabavie paśla hetaha jon napisaŭ u svaim tvitery, źviartajučysia da prezidenta Vieniesueły Nikałasa Madury:
«Pasłuchaj, Madura, ty bajaźliviec. Ty nie prymusiš padparadkavacca ni mianie, ni maju siamju. Majoj siamji: trymajciesia, ja vas lublu».
Madura uskłaŭ adkaznaść za biesparadki ŭ Karakasie, u vyniku jakich zahinuli try čałavieki i bolš za 60 byli paranienyja, na Łopiesa.
Masavyja akcyi pratestu pačalisia paśla aryštu udzielnikaŭ studenckich demanstracyj, jakija praciahvajucca ŭ roznych rehijonach krainy z pačatku lutaha.
Heta samyja surjoznyja vystupy suprać palityki Madury z momantu jaho prychodu da ŭłady viasnoj 2013 hoda. Ale ŭ Karakasie pa-raniejšamu pratestujuć tolki ŭschodnija rajony stalicy, dzie žyvie siaredni kłas.
Kamientary